اروپايي ټولنې د افغانستان سېلابځپلو لپاره ۵۰ زره یورو نوې مرسته اعلان کړه
د اروپايي ټولنې د بشرپاله مرستو دفتر اعلان کړی چې د افغانستان د سېلابځپلو د ملاتړ لپاره یې د سره صلیب او سرې میاشتې نړیوال فدراسیون ته ۵۰ زره یورو اضافي مرسته ځانګړې کړې ده.
د اروپايي ټولنې د بشرپاله مرستو دفتر اعلان کړی چې د افغانستان د سېلابځپلو د ملاتړ لپاره یې د سره صلیب او سرې میاشتې نړیوال فدراسیون ته ۵۰ زره یورو اضافي مرسته ځانګړې کړې ده.
یاد دفتر د چهارشنبې په ورځ، د غبرګولي په ۱۳مه، په اېکس خواله رسنۍ کې ویلي چې له دې نوې مرستې سره به د افغانستان د سېلابځپلو لپاره د اروپايي ټولنې ټولې مرستې ۲۲۵ زره یورو ته ورسېږي، چې د سره صلیب او سرې میاشتې نړیوال فدراسیون له لارې به ولګول شي.
د اروپايي ټولنې د بشرپاله مرستو دفتر ویلي چې دغه بودجه به د سېلابونو له امله زیانمنو شویو کورنیو ته د نغدي مرستو، سرپناه، پاکو اوبو او روغتیايي خدمتونو د برابرولو لپاره وکارول شي.
د یاد دفتر په وینا، د دغو مرستو موخه د هغو کورنیو لاسنیوی دی چې په وروستیو سېلابونو کې یې کورونه، شتمنۍ او د ژوند لومړني امکانات زیانمن شوي دي.
اروپايي ټولنې تر دې وړاندې هم د اپرېل میاشتې په وروستیو کې د افغانستان د سېلابځپلو د ملاتړ لپاره ۱۷۵ زره یورو مرسته اعلان کړې وه، څو شاوخوا ۱۲ زره زیانمنو شویو کسانو ته بېړنۍ بشري مرستې ورسول شي.
افغانستان په وروستیو میاشتو کې د پرلهپسې ورښتونو او سېلابونو له امله د پراخو بشري او اقتصادي زیانونو شاهد پاتې شوی، او نړیوالې مرستندویه ادارې د زیانمنو شویو کورنیو د ملاتړ لپاره د لا ډېرو مرستو غوښتنه کوي.
افغانستان انټرنشنل له یو شمېر هغو کسانو سره خبرې کړې دي چې په «ګولډ بياېس» کې یې پانګونه کړې وه. دوی وایي چې دغه د پانګونې پلاټفورم بند شوی او د دوی زرګونه ډالره پانګه هم په کې بنده پاتې ده، چې اوس یې د ایستلو امکان نه شته.
ګولډ بياېس چې په افغانستان کې د «توماس» په نوم هم پېژندل کېده، د لوړو او چټکو ګټو په ژمنو خلکو ته د پانګونې او د نویو غړو د جذبولو بلنه ورکوله.
په ورته وخت کې ګڼ شمېر هغو کاروونکو چې د حسابونو پر مخ یې له څو سوه تر څو زرو ډالرو پورې ګټه لیدله، ونه توانېدل چې دغه پیسې وباسي. ګولډ بياېس خپل فعالیت د ۲۰۲۴ کال په اکټوبر میاشت کې پیل کړی و او په لومړیو میاشتو کې د ځینو کاروونکو حسابونو د پام وړ زیاتوالی درلود، داسې چې ځینو یې په ظاهري ډول زرګونه ډالره ګټه ترلاسه کړې وه.
که څه هم د دې شبکې د کاروونکو کره شمېر نه دی خپور شوی، خو افغانستان انټرنشنل د هېواد په بېلابېلو سیمو کې له خلکو سره د خبرو پر بنسټ موندلې چې لسګونه زره کسانو په دې شبکه کې پانګونه کړې او میلیونونه ډالره پانګه ورته داخله شوې ده.
علیرضا بینش چې د دې پلاټفورم له کاروونکو څخه دی، افغانستان انټرنشنل ته ویلي چې خپله یې ۵۰۰ زره افغانۍ په ګولډ بياېس کې پانګونه کړې ده.
هغه زیاته کړه چې داسې کسان پېژني چې په دې پلاټفورم کې د پانګونې لپاره یې خپل کورونه، ځمکې، دوکانونه او حتی د ژوند لومړني اړتیايي توکي پلورلي دي.
افغانستان انټرنشنل له یوه بل کس سره هم خبرې کړې دي چې وایي ۲۱ زره امریکایي ډالره یې په دغه پلاټفورم کې بند پاتې دي او تر اوسه یې د ایستلو توان نه دی موندلی.
دغه پلاټفورم څنګه کار کاوه؟
ګولډ بياېس د هرمي شبکو په څېر جوړښت درلود او کاروونکي یې د چټکو او لوړو ګټو په ژمنه پانګونې ته هڅول. په داسې شبکو کې د پخوانیو غړو ګټې معمولاً د هغو پیسو له لارې ورکول کېږي چې نوي غړي دې سیستم ته راوړي.
کاروونکي وایي چې په ګولډ بياېس کې هر غړی دې ته هڅول کېده چې نور کسان هم جذب کړي. څومره چې د یوه کاروونکي تر لاس لاندې غړي ډېرېدل، همغومره یې د لوړې ګټې هیله هم ډېره کېده.
د دوی په وینا، د دې پلاتفورم د فعالیت په لومړیو پړاوونو کې یو شمېر کسانو د پام وړ ګټې ترلاسه کړې وې. همدې چارې د نورو خلکو باور هم جلب کړ او د نوې پانګې د ورتګ لامل شوه.
د کاناډا د بریټیش کولمبیا د ارزښتلرونکو اسنادو کمېسیون د روان کال د وري په څلورمه نېټه د ګولډ بياېس د مشکوکو فعالیتونو په اړه خبرداری ورکړ. دغه اداره وایي چې شرکت ورسره راجستر نه دی او هغه کسان چې د دې شرکت لهخوا پانګونې ته رابلل کېږي، باید له بشپړ احتیاط څخه کار واخلي.
د کاناډا د ارزښتلرونکو اسنادو نورو څارونکو ادارو هم د ګولډ بياېس نوم د پانګونې د خبرداریو په لېست کې شامل کړی دی. همدارنګه د ارزښتلرونکو اسنادو د کمېسیونونو نړیوال سازمان هم دغه شرکت په خپل نړیوال خبرداريز لېست کې ثبت کړی دی.
له دې وړاندې هم په افغانستان کې ورته هرمي شبکې فعالې شوې وې چې خلکو ته یې درانه مالي زیانونه اړولي وو. له تر ټولو مشهورو بېلګو څخه یې «ګولډکوېسټ» وه چې شاوخوا شل کاله وړاندې په افغانستان او د سیمې په یو شمېر هېوادونو کې فعاله وه او د لوړو ګټو او شبکيز غړیتوب د ژمنو له لارې یې ګڼ کسان جذب کړي وو.
د درنو زیانونو ترخې کیسې
ګولډ بياېس د افغانستان له بېلابېلو ولایتونو څخه کاروونکي جذب کړي وو. خو ځینې کاروونکي وایي چې د هزاره مېشتو سیمو د لومړنیو پانګوالو د پراخ حضور له امله دې شبکې وکولای شول له کابل او د هېواد له مرکزي سیمو څخه زرګونه نور غړي هم جذب کړي.
د کاروونکو په وینا، د دې پلاټفورم زیانمن شوي کسان یوازې په افغانستان کې نه دي، بلکې یو شمېر یې په بهرنیو هېوادونو کې هم ژوند کوي.
دوی وایي چې د خلکو د باور اصلي لامل هغه د پام وړ ګټې وې چې ځینو پانګوالو د فعالیت په لومړیو میاشتو کې ترلاسه کړې وې. د دوی په خبره، ډېرو خلکو دغه تادیات له نږدې لیدلي وو او همدې چارې هغوی پانګونې ته وهڅول.
د دې شبکې یوه کاروونکي، چې نه یې غوښتل نوم یې خپور شي، افغانستان انټرنشنل ته ویلي چې ۲۱ زره امریکایي ډالره یې په ګولډ بياېس کې پانګولي دي. هغه وویل چې په دې پلاټفورم کې د پانګونې لږ تر لږه اندازه ۵۰۰ افغانۍ وه، خو ځینو کسانو د لا زیاتې ګټې په تمه د دوو زرو ډالرو او یا تر دې هم لوړ ارزښت حسابونه جوړ کړي وو.
د هغه په وینا، د خپل اصلي دوه زره ډالري حساب تر څنګ یې څو نور فرعي حسابونه هم جوړ کړي وو، څو د هغو له لارې نور کسان جذب او خپله ګټه زیاته کړي.
دغه کاروونکی وایي چې یو شمېر پانګوالو په همدې طریقه ډېرې لویې پیسې سیستم ته داخلې کړې او د ځینو پانګه لسګونو زرو ډالرو ته ورسېده. هغه زیاتوي چې داسې ډېر کسان پېژني چې د لوړو ګټو د ترلاسه کولو په هیله یې د خپلې شتمنۍ لویه برخه په دې پلاټفورم کې پانګولې ده.
نذیر احمدي، چې د ګولډ بياېس بل کاروونکی دی، وایي ۵۰۰ ډالره یې له لاسه ورکړي دي.
هغه زیاتوي چې تر دې وړاندې هم ورته یو پلاټفورم فعال شوی و چې د لږې لومړنۍ پانګې په بدل کې یې لا ډېرې ګټې ورکولې، خو د شاوخوا ۱۵۰۰غړو تر جذب وروسته یې فعالیت ودرېد او ګڼ پانګوال زیانمن شول.
احمدي وایي، ګومان کوي چې هماغه کسان چې د ګولډ بياېس تر شا دي، پخوانی پلاتفورم یې هم جوړ کړی و، څو د خلکو باور ترلاسه او نوي غړي جذب کړي.
د هغه په وینا، ګولډ بياېس په بشپړه توګه له لاسرسي نه دی وتلی، خو د پیسو ایستل ترې ناشوني شوي او د کاروونکو پانګې کنګل شوې دي.
د پلاټفورم مسئولان څه وایي؟
د ګولډ بياېس کاروونکي وایي چې د دې پلاټفورم چلوونکو ورته ویلي چې د شرکت پر ضد د منفي راپورونو له امله د امریکا د مالي ادارو له خوا د پلاتفورم فعالیتونه او د کاروونکو شتمنۍ بندې شوې دي.
مشتاق، چې د دې پلاټفورم یو بل کاروونکی دی، افغانستان انټرنشنل ته ویلي چې له حسابونو څخه د پیسو ایستل ناشوني دي او یوازې د حسابونو ظاهري موجودي ښکاري.
هغه وایي، کاروونکو ته په استول شوي پیغام کې ویل شوي چې حسابونه د یوې امریکایي ادارې تر څېړنې لاندې راغلي او په موقتي ډول ځنډول شوي دي.
مشتاق دغه ادعا ردوي او وایي چې په پخوانیو ورته پېښو کې هم ورته ژمنې شوې وې، خو د خلکو پانګې هېڅکله بېرته ور ونه ګرځېدې. هغه زیاته کړه چې په دې پلاټفورم کې ډېرې لویې پیسې بندې پاتې دي او داسې ښکاري چې بیا به ورته لاسرسی ممکن نه وي.
مجید، چې د ګولډ بياېس بل کاروونکی دی، وایي د پلاتفورم مسئولانو ورته ویلي چې کاروونکي باید د خپلې موجودۍ شل سلنه په یوه نوي پلاتفورم کې پانګونه وکړي، څو شرکت له اوسني کړکېچ څخه ووځي او خپل فعالیت بېرته پیل کړي.
د هغه په وینا، د ګولډ بياېس چلوونکو ژمنه کړې چې که کاروونکي دغه اندازه پیسې ورکړي، نو اصلي پانګه او راټولې شوې ګټې به یې په نوي پلاتفورم کې حسابونو ته ولېږدول شي.
یو بل کاروونکي هغه پیغام افغانستان انټرنشنل ته سپارلی چې د ده په وینا د ګولډ بياېس د چلوونکو له خوا استول شوی دی.
په دغه پیغام کې له کاروونکو غوښتل شوي چې د خپلې حسابي موجودۍ شل سلنه د «سي اېچ زي بېټ» په نوم صرافۍ ته ولېږي، څو نوې ډلې ته انتقال شي.
په پیغام کې دا هم ویل شوي چې دغه پیسې د حساب د فعالولو فیس، جریمه یا د موجودۍ له کمښت سره تړاو نه لري، بلکې د امنیتي هویتپېژندنې د بهیر یوه برخه ده.
د پلاټفورم چلوونکي ادعا کوي چې د څېړنو له پای ته رسېدو وروسته به دغه پیسې د کاروونکو له پخوانۍ موجودۍ سره یو ځای په حسابونو کې پاتې شي او د کارولو یا ایستلو امکان به یې برابر شي.
د پیغام په پای کې راغلي چې شرکت له روانې څېړنې سره همکاري کوي او هغه کاروونکي چې د هویتپېژندنې ټول پړاوونه بشپړ کړي، د عادي فعالیتونو د بېرته پیل او خپلو حسابونو ته د لاسرسي په برخه کې به لومړیتوب ولري.
د طالبانو د ټولګټو چارو وزارت اعلان کړی، چې د هېواد په شمال کې د سختو بارانونو او سېلابونو راوتلو له امله د بغلان، سمنګان او تخار ولایتونو یو شمېر تړل شوې لویې او مواصلاتي لارې د ترافیکو پرمخ بېرته پرانیستل شوي دي.
دغه لارې د سېلابونو د راوتلو او د سړکونو د ویجاړېدو له امله په موقتي ډول تړل شوې وې، چې د مساپرو لپاره یې ګڼې ستونزې جوړې کړې وې.
د دغه وزارت د معلوماتو له مخې، په پرانیستل شویو لارو کې د بغلان ولایت اړوند د دوشي – پلخمري او بغلان – کندز مسیرونه د چهارشنبې تپې په سیمه کې، د بنو – دهصلاح لاره، د سمنګان ولایت د ایبک – مزارشریف لاره او د تخار ولایت د کلفګان ولسوالۍ په څو سیمو کې د تخار – بدخشان لاره شاملې دي.
دغه لارې د یادو ولایتونو د ټولګټو ریاستونو د تخنیکي ټیمونو او وسایطو په واسطه له خټو او سېلابي پاتې شونو پاکې شوې او د شپې ناوخته بېرته پرانیستل شوې دي.
بلخوا، د طالبانو د ټولګټو وزارت ویلي چې د بغلان ولایت د نهرین – برکه لاره لا هم د ترافیکو پرمخ تړلې ده. د دغه وزارت په خبرپاڼه کې راغلي چې د دغې لارې د بېرته خلاصولو او پاکولو چارې به د پنجشنبې په ورځ په رسمي ډول پیل شي ترڅو د سیمې د اوسېدونکو ستونزې حل شي.
همدارنګه د طالبانو د ټولګټو وزارت له ټولو خلکو او موټر چلوونکو غوښتي چې پر یادو لارو د تګ راتګ پر مهال ترافیکي قوانین په جدي توګه مراعت کړي او د پېښو د مخنیوي لپاره په بشپړ احتیاط سره سفر وکړي.
سږ کال په افغانستان کې سختو او ویجاړونکو سېلابونو خلکو ته درانه مالي او ځاني زیانونه هم اړولي دي.
اریانا افغان هوایي شرکت وایي، چې کابل ته د افغان حاجیانو په لومړنۍ راستنې شوې الوتکې کې یې مسافرو ته د طالبانو د مشر ملا هبت الله ۱۷ مه ګڼه فرمان په چاپي بڼه ویشلی دی. دا فرمان په ټولنه کې د ناوړه دودونو په تړاو دی.
خبرپاڼه کې راغلي چې د الوتکو مېلمهپالانو په خپلو لاسونو مساپرو ته په چاپي بڼه د ملا هبت الله یاد فرمان ویشلی دی. په یوې ویډیو کې ښکاري چې د اریانا افغان هوايي شرکت دوه تنه مېلمهپالان د دغه فرمان چاپ شوې نسخې په لاس کې لري او په خلکو یې ویشي.
د الوتکې مېلمهپاله یو افغان حاجي په پرواز کې له خوب څخه راویښوي او ورته دغه فرمان سپاري. د ملا هبت الله ۱۷ مه ګڼه فرمان کې له خلکو غوښتل شوي چې په خپلو ټولنو کې دودونه لهمنځه یوسي او خپل کړه وړه د اسلامي شرعیت لهمخې ترسره کړي. همدا راز په فرمان کې له حاجیانو غوښتل شوي، څو د مېلمنو د ښه راغلاست لپاره ډېرو لګښتونو، قیمتي ډالیو، خیراتونو او نورو رواجونو څخه ډډه وکړي.
تر دې مخکې د ملا هبت الله فرمانونه د هېواد په بېلابېلو ولایتونو کې په لویو لویو بېل بورډونو چاپ شوي او همدا راز د طالبانو ملایانو د جوماتونو د منبرونو له لارې هم پر خلکو اورېدلي دي. د طالبانو د مشر فرمانونه له سختدریځۍ سرچینه اخلي او د راپورونو له مخې، د خلکو ژوند یې سخت کړی دی.
نړیوالو بنسټونو د ملا هبت الله ډېری فرمانونه د ښځو، بشري حقونو، بیان ازادۍ او انساني ازادیو ضد بللي دي.
د بلخ په مرکز مزارشریف کې د سهار څلور بجې دي. ښار لا هم د شپې په تیارو کې ډوب دی. شپاړس کلن بهزاد د سهار له روښنایۍ وړاندې له خوبه راپاڅېږي. د سهار لمونځ ادا کوي، جای نماز ټولوي او ښوونځي ته د تګ چمتووالی نیسي.
نن دوی شپږ درسي مضمونونه لري، خو هغه یوازې درې کتابونه په خپل بکس کې ږدي، ځکه د مضمونونو د نیمایي برخې لپاره ښوونکي نهلري. د سهار پنځه بجې بهزاد بېرته خپل بستر ته ورګرځي او په ژور خوب ویده کېږي.
کله چې د سهار په ۷ نيمو بجو بیا راویښېږي، ساده ناشته ورته چمتو وي؛ وچه ډوډۍ، چای او بوره. وروسته ټاکل شوې جامې اغوندي؛ـ سپینې دودیزې جامې او سپینه خولۍ او ورسره د ښوونځي پر لور روانېږي.
خو د هغه اوولس کلنه خور مریم په کور کې پاتې کېږي او د خوړو دسترخوان ټولوي. دا دی ۱۷۱۹ ورځې کېږي چې هغې ته د ښوونځي د تګ اجازه نهده ورکړل شوې.
له خولۍ او جامو پرته ښوونځي ته نهشئ ننوتلی
د بهزاد ښوونځی په رسمي ډول پرانیستی دی. د دروازې مخې ته زدهکوونکي په کتارونو کې ولاړ دي او د ننوتلو اجازې ته انتظار باسي.
هغه د مزارشریف ښار د کارته خراسان سیمې د حضرت نعمان لېسې د اووم ټولګي زدهکوونکی دی او هره ورځ د سهار له اتو بجو څخه د غرمې تر دولسو بجو پورې په ښوونځي کې وي.
په تېرو کلونو کې د هغه د ښوونځي رسمي یونیفورم شین یخنقاق او تور پتلون وو. خو د نوي تعلیمي کال له پیل سره، د وري په میاشت کې د طالبانو د پوهنې وزارت اعلان وکړ، چې د لومړنیو او منځنیو ټولګیو زدهکوونکي باید سپین پرتوګ و کمیس او سپینه خولۍ واغوندي او د لېسې زدهکوونکي باید لونګۍ او جامې واغوندي.
د ښوونځي په دروازه کې د نظم او انضباط مسوول ولاړ دی؛ یو نارینه ښوونکی چې لونګۍ، پرتوګ , کمیس او اوږده ږیره لري او په ځانګړي ډول د زدهکوونکو پر جامو او ظاهري بڼې د مقرراتو د پلي کېدو څارنه کوي.
بهزاد چې همدا ټاکل شوې جامې او سپینه خولۍ یې پر سر ده، د ننوتلو اجازه ترلاسه کوي. خو هغه زدهکوونکي چې دا ډول جامې یې نهدي اغوستي، د ښوونځي انګړ له ننوتلو څخه منع کېږي او د دروازې شا ته پاتې کېږي.
د ښځینه ښوونکو تش ځای
لومړی درسي ساعت پیلېږي، خو په ټولګي کې هېڅ ښوونکی نهشته. زدهکوونکي د ښوونځي په انګړ کې سرګردانه ګرځي؛ ځینې د خوب د کمښت له امله پر څوکیو غځېدلي دي، ځینې خپل سرونه پر مېزونو ایښي او د خوب پوره کولو هڅه کوي او یو شمېر نور په خبرو اترو او لوبو بوخت دي.
د ښوونکو کمښت د دې ښوونځي له سترو ستونزو څخه دی.
په خراسان ښوونځي کې د اوومو ټولګیو لپاره یوازې د څلورو مضمونونو ښوونکي شته. په هغو ورځو کې چې درې ښوونکي حاضر شي، زدهکوونکي ورته «د ډېر درس ورځ» وایي، خو حتی په هماغه ورځ هم لږ تر لږه درې درسي ساعته بې له تدریس څخه تېرېږي.
په افغانستان کې د طالبانو له بیا واکمنېدو (د ۱۴۰۰ کال زمري میاشت) وروسته، ښځینه ښوونکې د هلکانو له لېسو څخه لرې کړل شوې؛ هغه پرېکړه چې د زدهکوونکو او مسوولینو په وینا یې په تعلیمي نظام کې یوه ستره تشه رامنځته کړه. اوس نږدې پنځه کاله وروسته هم دا تشه لا نهده ډکه شوې.
څلور نیم کاله وړاندې فریده عارفي د حضرت نعمان لېسې مدیره وه، خو د بدلونونو له راتګ وروسته دا دنده ترې واخیستل شوه او د مولوي سیفالدین په نوم یوه دیني عالم ته وسپارل شوه.
بهزاد وایي، چې نن ورځ د دوی په ټولګیو کې هېڅ ښځینه ښوونکې درس نهورکوي. ډېری ښځینه ښوونکې یا په کورونو کېنول شوې دي او یا هم د لومړنیو ټولګیو تدریس ته لېږدول شوې دي.
نیمه ورځ ښوونکی، نیمه ورځ ریکشا چلوونکی
په دویم درسي ساعت کې بالاخره ښوونکی ټولګي ته راځي؛ یو منځنی عمر لرونکی سړی چې دوړو نیولې لونګۍ، اوږده ږیره او پرتوګ و کمیس یې اغوستی دی. د هغه بڼه د یوه ښوونکي تر رسمي جامو ډېر د یوه عادي کارګر د ورځنیو جامو په څېر ښکاري.
زدهکوونکي په بېحوصلګۍ له خپلو ځایونو راپورته کېږي. ځینې خپل کتابونه له بکسونو راوباسي او ځینې نور هېڅ کتاب له ځان سره نهلري.
د ټولګي په یوه کونج کې څو تشې څوکۍ پرلهپسې ایښودل شوې دي؛ دا څوکۍ یوازې د هغو زدهکوونکو لپاره نهدي چې غیر حاضر دي، بلکې د هغه نسل استازیتوب هم کوي چې ورو ورو له زدهکړو څخه لرې کېږي.
د اووم ټولګي شپاړس کلن زدهکوونکی بهزاد وایي، چې د ښوونځي نظم نور د پخوا په څېر نهدی پاتې. هغه وایي: «ښوونکي نوره انګېزه نهلري. ځینې مشران زدهکوونکي له استادانو سره بېادبي کوي او هېڅوک هم ورته څه نهشي ویلای».
نوموړی هغه ټولګي ته اشاره کوي، چې پخوا به پهکې له څلوېښتو څخه ډېر زدهکوونکي وو، خو اوس یې د زدهکوونکو شمېر ۲۵ ته راټیټ شوی دی. د هغه په وینا، ډېرو زدهکوونکو نور باور له لاسه ورکړی چې ښوونځی به وکولای شي د دوی راتلونکی بدل کړي.
ستونزه یوازې د زدهکوونکو په کمښت پورې نهده محدوده. پر زړو لرګینو مېزونو نیمګړي او دویم لاس کتابونه پراته دي. د ښوونځي ادارې یوازې د درسي کتابونو یوه برخه وېشلې ده او کورنۍ اړې شوې چې پاتې کتابونه له بازاره واخلي.
په بازار کې د کتابونو تور او سپین چاپ شوي نسخې په ۴۰ افغانۍ او رنګه نسخې تر ۱۰۰ افغانیو پورې پلورل کېږي؛ دا په داسې حال کې ده، چې په افغانستان کې ډېرې کورنۍ د ورځنۍ ډوډۍ د برابرولو لپاره هم له سختو اقتصادي ستونزو سره مخ دي.
درس تر هغه مودې لنډ وي چې په رسمي مهالوېش کې ورته ټاکل شوې ده. ښوونکی د کتاب څو مخونه په یو شان غږ لولي، حاضري او د تدریس اسناد لاسلیکوي او بیا ټولګی پرېږدي.
د هغه لپاره ښوونځی یوازې د ورځې د کار یوه برخه ده.
بهزاد وایي، چې هره ورځ له ځانه دا پوښتنه کوي چې ښوونځي ته راتګ یې ښه دی که نه راتګ. ځکه پلار یې څو ځله ورته ویلي، چې د ښوونځي پر ځای کولای شي کوم کسب یا مسلک زده کړي او د کورنۍ له اقتصادسره مرسته وکړي.
بهزاد وایي، چې ډېری ښوونکي له درسي ساعتونو وروسته مستقیم خپلې دویمې دندې ته ځي؛ ځینې کراچۍ چلوي، ځینې مزدوري کوي او ځینې نور د مزارشریف په کوڅو او سړکونو کې ریکشا چلوي.
هغه وایي: «زموږ استادان د ماسپښین له خوا ریکشا چلوي».
د نن ورځې افغانستان کې د ښوونکي دنده نور تل د تدریس معنا نهلري؛ کله ناکله دا یوازې د یوې اوږدې ورځې لومړۍ کاري پړاو وي، څو انسان خپل ژوند پر مخ یوسي.
حذف شوي درسونه
بهزاد د دري ژبې کتاب ور اړوي او ناڅاپه د کتاب په منځ کې تم کېږي. د کتاب له منځه څو پاڼې اېستل شوې دي او تش ځایونه یې لا هم په صحافت کې ښکاري. دا هماغه فصلونه دي چې نور یې د تدریس اجازه نهشته.
د نن ورځې د افغانستان په ټولګیو کې سانسور یوازې په الفاظو او جملو کې نهلیدل کېږي، بلکې انسان یې په خپلو لاسونو لمس کولای شي.
د طالبانو د پوهنې وزارت د ۱۴۰۴ کال د وږي په میاشت کې لږ تر لږه ۵۱ درسي موضوعات له تعلیمي نصابه لرې کړل؛ د ښځو د حقونو او بشري حقونو له موضوعاتو نیولې، د مور ورځې، د ګل سرخ مېلې، ولسي سندرو او ان د افغانستان د فرهنګي میراث اړوند ځینو برخو پورې.
طالب چارواکو ویلي، چې دغه مطالب له «دیني لارښوونو» او د «اسلامي امارت له پالیسۍ» سره سمون نهلري.
د دې پرېکړو له امله ځینې مضمونونه په بشپړ ډول له نصابه اېستل شوي او ځینې نور یوازې په داسې کتابونو کې پاتې دي چې ځینې پاڼې یې شکول شوې دي.
بهزاد وایي، چې اوس د دوی درسي مضمونونه د پخوا پرتله کم شوي دي. همدا راز د مدني زدهکړو، هنر او وطنپالنې په څېر مضمونونه نور نه تدریسېږي. هغه وایي: «کله کله چې کتاب پرانیزو، وینو چې څو پاڼې پهکې بیخي نهشته».
خو اصلي تناقض په بل ځای کې دی.
حضرت نعمان لېسه، چې بهزاد پهکې زدهکړې کوي، د فزیکي امکاناتو لهمخې د مزارشریف له مجهزو ښوونځیو څخه شمېرل کېږي. دا یوه نوې ودانۍ لري، د کمپیوټر لابراتوار، کتابتون او رغول شوي ټولګي پهکې موجود دي.
دا پروژه د تېر حکومت په وروستیو کلونو کې د جرمني په مالي ملاتړ پیل شوې وه او د طالبانو له بیا واکمنېدو وروسته بشپړه شوه. لږ تر لږه په ظاهري بڼه پهکې هر څه د یوه عصري ښوونځي په څېر ښکاري. خو د ټولګیو دننه زدهکوونکي له نیمګړو کتابونو، د ښوونکو له کمښت او له حذف شویو درسي موضوعاتو سره مخ دي.
بهزاد په ارامه لهجه وایي: «ښوونځی ډېر مجهز جوړ شوی دی، امکانات یې ښه دي، خو سمه زدهکړه پهکې نهشته».
د نن ورځې افغانستان کې ستونزه یوازې د ښوونځي نشتوالی نهدی؛ کله کله ښوونځی موجود وي، خو هغه څه چې پهکې نهوي، خپله زدهکړه او تعلیم وي.
«زما ټولګیوال پوهنتون ته د تګ لېوالتیا نهلري»
د افغانستان د پخواني نسل ډېرو زدهکوونکو لپاره به د دولسم ټولګي پای له یوې ګډې هیلې سره مل وو؛ کانکور، پوهنتون او ښایي داسې دنده چې د کورنۍ ژوند بدل کړي. خو احمدعلي وایي، چې دا هیله اوس د مزارشریف په ټولګیو کې پیکه شوې ده.
احمدعلي ۱۸ کلن دی او د عبدالعلي مزاري نمبر ۲ عالي لېسه کې زدهکړې کوي. کله چې د راتلونکي په اړه خبرې کوي، غږ یې د داسې چا په څېر ښکاري چې د یوه له لاسه تللي شي په اړه غږېږي، نه د داسې څه په اړه چې لا هم ورته سترګې په لاره وي.
هغه وایي: «پخوا به چې زدهکوونکی لسم ټولګي ته ورسېده، په شوق به یې د کانکور په کورسونو کې نوم لیکنه کوله. موږ فکر کاوه چې پوهنتون ته به ځو، د خپلې خوښې په څانګه کې به زدهکړې کوو او وروسته به د کار زمینه برابره شي. خو اوس دا هیله ډېره پیکه شوې ده».
د نن ورځې افغانستان کې پوهنتون د ډېرو تنکیو ځوانانو لپاره نور د ښوونځي طبیعي دوام نه ګڼل کېږي؛ بلکې داسې امتیاز ته ورته دی چې ترلاسه کول یې ډېر ستونزمن او لرې ښکاري.
د کانکور د چمتووالي د کورسونو لګښتونه، پراخه بېوزلي او د کار د فرصتونو نشتوالی ګڼې کورنۍ دې ته اړې کړې دي چې د زدهکړو او ژوندي پاتې کېدو ترمنځ یو انتخاب وکړي.
احمدعلي اوس په اونۍ کې یوازې دوه ورځې ښوونځي ته ځي. د اونۍ په نورو ورځو کې د موټرو په یوه ترمیمي ورکشاپ کې کار کوي. هغه وایي: «ما خپلو ښوونکو ته ویلي، چې اړ یم کار وکړم، نو هیله ده چې غیر حاضر مې حساب نهکړي».
نوموړی زیاتوي، چې د ده ګڼ شمېر ټولګیوال هم د زدهکړو ترڅنګ درانه کارونه ترسره کوي؛ ځینې په بازار کې کار کوي، ځینې په ورکشاپونو کې او ځینې نور د ورځې مزدورۍ ته ځي. څلور کاله وړاندې، کله چې احمدعلي په اتم ټولګي کې وو، د دوی د ښوونځي ډېری ښوونکي ښځې وې.
هغه وایي: «زموږ په ټولګي کې لسو ښوونکو درس راکاوه چې اته تنه یې ښځې وې. اوس له هغوی څخه یوه هم نه ده پاتې». د هغه په وینا، د ښوونکو کمښت اوس د ښوونځي د ورځني ژوند یوه عادي برخه ګرځېدلې ده.
ځینې ورځې له شپږو مضمونونو یوازې دوه یا درې ښوونکي حاضر وي. ان تخصصي مضمونونه هم کله ناکله د اړوندو او مسلکي ښوونکو له نشتوالي سره مخ دي.
احمدعلي په ترخه موسکا وایي: «تېر کال مو د کال تر پایه د فزیک ښوونکی نهدرلود. سږ کال یې یو ملا د فزیک د ښوونکي په توګه مقرر کړی دی، حال دا چې هغه خپله پر فزیک هېڅ نهپوهېږي». په داسې شرایطو کې پوهنتون نور د ډېرو زدهکوونکو لپاره بل پړاو نهښکاري، بلکې یوه لرې او مبهمه مفکوره ده چې ورو ورو د ځوانانو له ذهنونو څخه وځي.
د احمد علي په خبره: «نن سبا د ډېرو زدهکوونکو په منځ کې دا احساس پیدا شوی چې که درس هم ولولي، معلومه نه ده، چې خپلو هیلو او ارمانونو ته به ورسېږي که نه».
په هغه هېواد کې چې ځوان نسل یې یو وخت زدهکړه د ژغورنې یوازنۍ لاره ګڼله، ښایي تر ټولو خطرناک بدلون همدا وي چې خلک پر خپل راتلونکي باور له لاسه ورکوي.
د ملګرو ملتونو د ماشومانو وجهي صندوق (یونېسف) د ۱۴۰۴ کال د تلې په میاشت کې اعلان وکړ، چې په افغانستان کې له دوو میلیونو څخه زیات ماشومان له زدهکړو محروم دي او له لسو کلونو څخه د زیات عمر لرونکو څه باندې ۹۰ سلنه ماشومان نه شي کولای ساده متنونه ولوستلای شي.
د یونېسف په وینا، زدهکوونکي «ښوونځیو ته ځي، خو څه نه زده کوي». دغه بنسټ دا وضعیت د طالبانو د محدودونکو او کمزورو تعلیمي پالیسیو پایله بولي.
د خصوصي ښوونځیو وضعیت
د روضتالله لپاره له دولتي ښوونځي څخه خصوصي ښوونځي ته لېږد باید د ښه وضعیت پر لور یو بدلون وای، خو د هغه تجربه ښيي چې د دغو دوو تعلیمي بنسټونو ترمنځ واټن هومره هم روښانه نهدی. هغه ۱۴ کلن دی او تر دې وړاندې یې د کابل د خراسان ښارګوټي په دولتي ښوونځي کې زدهکړې کولې.
اوس هغه په یوه خصوصي ښوونځي کې ناست دی؛ داسې ځای کې چې کورنۍ یې هیله لرله د زدهکړو کیفیت به پکې ښه وي. خو د هغه په وینا، هغه څه چې ده په دواړو تجربو کې لیدلي، د توپیر پرتله ډېر ورته والی لري.
نوموړی وايي: «پخوا مو ډېر ښوونکي درلودل، خو اوس یې شمېر کم شوی دی. ډېری ښځینه ښوونکې یا د نجونو تر شپږم ټولګي پورې ښوونځیو ته لېږدول شوې دي او یا په بشپړه توګه له دندو ګوښه شوې دي».
دا بدلون یوازې یوه اداري شمېره نهده؛ بلکې د روضتالله پر شخصي ژوند هم ژور اغېز لري. د هغه مور کلونه کلونه په هماغه دولتي ښوونځي کې ښوونکې وه، خو د تعلیمي نظام له بدلون وروسته یې خپله دنده له لاسه ورکړه او اوس په یوه خصوصي ښوونځي کې تدریس کوي.
هغه په ارام خو دروند غږ وایي: «زما مور پخوا په همدې ښوونځي کې ښوونکې وه، خو د طالبانو له راتګ وروسته نور اجازه نهورکول کېده چې هلته تدریس وکړي».
همدا کورنۍ تجربه د هغه د خصوصي ښوونځي د انتخاب لامل شوه.
هغه وویل: «مور مې ویل کېدای شي په خصوصي ښوونځي کې تعلیمي وضعیت ښه وي، نو ځکه یې زه دلته شامل کړم».
خو د هغه په وینا، د خصوصي او دولتي ښوونځیو ترمنځ توپیر تر ډېره په جزییاتو کې دی، نه په اصل کې.
نوموړي زیاته کړه: «په خصوصي ښوونځي کې هم ستونزې شته. ډېر لوی توپیر نهلري؛ یوازې ښوونکي یې لږ زیات دي او درسونه پهکې یو څه ښه پر مخ ځي».
په دواړو درسي نظامونو کې یوه ګډه ستونزه لیدل کېږي؛ د تجربه لرونکو ښوونکو کمښت او د تعلیمي پرسونل نشتوالی. د روضتالله په وینا، دغه کمښت په مستقیم ډول د زدهکړو پر کیفیت اغېز کړی دی.
د هغه په خبره، کله چې ښوونکي کم وي، طبیعي ده چې ټولو ټولګیو ته سمه پاملرنه نهکېږي او اغېز یې په خپلو درسونو کې احساسوو.
راتلونکي ته د باور کمېدل
د دغو بدلونونو تر شا د راتلونکي په اړه یو ډول ورو ورو زیاتېدونکې بېباوري هم رامنځته شوې ده.
روضتالله وایي، چې زدهکوونکي نور د پخوا په څېر د پوهنتون او راتلونکي په اړه په ډاډه زړه خبرې نهکوي.
هغه وایي: «پخوا زدهکوونکي ډېر هیلهمن وو او د خپل راتلونکي لپاره یې پلانونه درلودل، خو اوس ډېر کسان نه پوهېږي چې له ښوونځي وروسته به څه ورسره وشي»
د هلکانو د زدهکړو پټې ستونزې
د بشري حقونو د څار نړیوال سازمان د ۱۴۰۲ کال د لیندۍ په میاشت کې په یوه راپور کې ویلي وو،که څه هم طالبان د نجونو او ښځو د منځنیو او لوړو زدهکړو د مخنیوي له امله له پراخو نړیوالو غبرګونونو او نیوکو سره مخ شوي دي، خو هغو زیانونو ته ډېره کمه پاملرنه شوې چې دوی د هلکانو د زدهکړو پر بهیر اړولي دي.
دغه سازمان لیکلي: «د طالبانو تر واک لاندې د هلکانو په ښوونځیو کې د زدهکړو کیفیت په جدي ډول راټیټ شوی دی».
د بشري حقونو د څار سازمان زیاته کړې، چې طالبانو ښځینه ښوونکې د هلکانو له تدریس څخه منع کړې دي او د هغوی پر ځای یې داسې نارینه ښوونکي ګومارلي چې لازمې مسلکي وړتیاوې نهلري. د راپور له مخې، دغه بدلون د هلکانو پر زدهکړو ناوړه اغېز کړی دی.
دغه سازمان ادعا کوي، چې د طالبانو تر واک لاندې افغانستان کې په ښوونځیو کې د زدهکوونکو د سزا ورکولو کچه هم لوړه شوې ده.
یو نسل چې د زدهکړو پر ارزښت شکمن شوی
د افغانستان په بېلابېلو ښارونو کې د هلکانو د ښوونځیو وضعیت ښيي چې ستونزه یوازې د نجونو له زدهکړو سره نه ده محدوده.
که څه هم نجونې له شپږم ټولګي پورته له زدهکړو بېبرخې شوې دي، خو هغه هلکان چې لا هم ښوونځیو ته ځي، له داسې تعلیمي چاپېریال سره مخ دي چې د ښوونکو له کمښت، نیمګړو کتابونو، حذف شویو درسي مضمونونو، کمزورې تدریسي کچې او د راتلونکي په اړه له ناهیلۍ ډک دی.
په مزارشریف، کابل او د افغانستان په ګڼو نورو سیمو کې ډېر زدهکوونکي نور ښوونځی د خپلې بریا او پرمختګ لاره نه ګڼي.
ځینې د خپلې کورنۍ د اقتصادي ستونزو له امله کار ته مخه کوي، ځینې د زدهکړو د کیفیت له کمښت څخه شکایت کوي او ځینې نور باور لريؤ چې حتی د زدهکړو له بشپړېدو وروسته هم د کار او پرمختګ فرصتونه نهلري.
همدا لامل دی، چې د یوه نسل په ذهن کې ورو ورو دا پوښتنه راټوکېږي: «ایا ښوونځي ته تلل لا هم د ښه راتلونکي تضمین دی؟»
د شپاړس کلن بهزاد خبره ښايي د زرګونو افغان زدهکوونکو د احساساتو استازیتوب وکړي؛ هغه زدهکوونکی چې هر سهار له خوبه راپاڅېږي، ښوونځي ته ځي، خو لا هم له ځانه پوښتي: «نه پوهېږم ښوونځي ته تلل ښه دي که نه تلل».
دا جمله یوازې د یوه زدهکوونکي شخصي پوښتنه نه ده، بلکې د افغانستان د ښوونې او روزنې د اوسني وضعیت او د یوه نسل د راتلونکي په اړه د ژورې اندېښنې څرګندونه هم ده.
د اروپا په پارلمان کې له افغانستان سره د اړیکو د پلاوي مشرې راکل ګارسیا هرمیدا وندروال بروکسل ته د طالب استازو د احتمالي بلنې په اړه سختې نیوکې کړي او د ښځو پر وړاندې یې د دې ډلې تګلاره یې «جنسیتي اپارتاید» او د بشریت ضد جنایت بللی دی.
هغې ټینګار وکړ، چې د طالبانو غړي باید د اروپايي ټولنې له هر کلي سره مخ نهشي، بلکې ونیول شي او د جرمونو نړیوالې جزایي محکمې ته وسپارل شي.
وندروال له افغانستان انټرنشنل سره په خبرو کې وویل، چې اروپايي ټولنه طالبانو ته هېڅ ډول مشروعیت نهورکوي او په اوسنیو شرایطو کې له دې ډلې سره د رسمي تعامل لپاره هېڅ زمینه نهشته.
هغې زیاته کړه، چې اروپايي ټولنه له هېوادونو سره د اړیکو او تعامل لپاره پنځه اساسي معیارونه لري، خو د هغې په وینا، د طالبانو تر واک لاندې افغانستان کې له دغو معیارونو څخه یو هم نه دی رعایت شوی.
هغې همداراز د اروپايي ټولنې د ځینو غړو هېوادونو او طالبانو ترمنځ د اړیکو په اړه اندېښنه څرګنده کړه او ویې ویل، چې باید د اروپايي ټولنې د رسمي سیاست او د ځینو دولتونو د خپلواکو تګلارو ترمنځ توپیر وشي.
په وروستیو میاشتو کې جرمني د طالبانو استازي په برلین او بن ښارونو کې منلي او د افغان کډوالو د اېستلو په برخه کې یې له دې ډلې سره همکاري کړې ده. ناروې هم تر دې وړاندې په اوسلو کې د طالبانو د پلاوو کوربهتوب کړی وو.
د طالبانو د عادي کولو په اړه خبرداری
دې هسپانوۍ سیاستوالې بروکسل ته د طالبانو د استازو د بلنې احتمال «ډېر خطرناک» وباله او ویې ویل: «طالبانو ته بلنه ورکول دا پیغام رسوي، چې د دې ډلې کړنې د منلو وړ دي. دا ډول اقدام به د طالبانو د عادي کولو او مشروع ښودلو په معنا وي او د اروپا پارلمان به ورسره مخالفت وکړي».
هغې د اروپايي کمېسیون هغه استدلال هم رد کړ، چې وایي د افغان کډوالو د اېستلو په اړه باید له طالبانو سره خبرې وشي.
د نوموړې په وینا، له داسې ډلې سره خبرې اترې نهشي کېدای چې خپله د افغانستان د خلکو د پراخې کډوالۍ له اصلي لاملونو څخه دي.
د طالب مشرانو د عدلي تعقیب غوښتنه
وندروال د ښځو او نجونو پر وړاندې د طالبانو تګلاره د «جنسیتي اپارتاید» څرګنده بېلګه وبلله. نوموړې زیاته کړه، چې هڅې روانې دي څو دغه مفهوم د بشریت ضد جنایت په توګه په رسمیت وپېژندل شي.
هغې وویل: «د جنسیتي اپارتاید په رسمیت پېژندل کېدل کولای شي د طالبانو د غړو پر سفرونو محدودیتونه ولګوي او د دې ډلې د مشرانو پر ضد د نیولو په تړاو د نړیوالو حکمونو د صادرېدو زمینه لا پراخه کړي».
د اروپا پارلمان له افغانستان سره د اړیکو د پلاوي مشرې زیاته کړه، چې د اروپايي ټولنې غړي هېوادونه باید د طالبانو هر هغه غړی ونیسي، چې اروپايي خاورې ته داخلېږي او وروسته یې د جرمونو نړیوالې محکمې ته وسپاري.
هغې د خپلو څرګندونو په پای کې د طالبانو پر وړاندې د نړیوالو فشارونو او بندیزونو د لا زیاتېدو غوښتنه وکړه او ویې ویل، چې نړیواله ټولنه باید په افغانستان کې د اوسني وضعیت د پای ته رسولو لپاره پر طالبانو لا ډېر فشار وارد کړي.