د افغانستان د ښځینه فوټبال لوبډله له کوک ټاپوګانو سره دوستانه سیالۍ کوي
نړیوالو رسنیو راپور ورکړی چې د افغانستان د ښځینه فوټبال لوبډله، د فوټبال نړیوال فدراسیون (فیفا) له لوري په نړیوالو سیالیو کې د ګډون د اجازې د ترلاسه کولو وروسته، په نیوزیلنډ کې د کوک ټاپوګانو د ښځینه فوټبال لوبډلې پر وړاندې د دوستانه سیالیو ډګر ته ښکته کېږي.
د راپورونو له مخې، دغه لوبډله به د روانې اوونۍ په ترڅ کې له کوک ټاپوګانو سره دوه دوستانه لوبې ترسره کړي. اېبيسي نیوز راپور ورکړی چې د افغانستان د ښځینه فوټبال لوبډلې ۲۳ غړې دا مهال د نیوزیلنډ په اوکلنډ ښار کې په یوه تمریناتي کمپ کې حضور لري او د راتلونکو سیالیو لپاره چمتووالی نیسي.
فیفا هم تر دې وړاندې اعلان کړی و چې د افغانستان د ښځینه فوټبال لوبډله به د جون په ۴مه او ۸مه نېټه په اوکلنډ ښار کې د اوقیانوسیې سیمې له استازې لوبډلې، یعنې د کوک ټاپوګانو له لوبډلې سره دوه دوستانه سیالۍ ترسره کړي.
د لوبډلې مشرې روزونکې، پائولین همیلl، ویلي چې دغه سیالۍ د لوبغاړو لپاره مهم فرصت برابروي څو له نړیوالو سیالیو، فشارونو او بېلابېلو شرایطو سره لا ډېر بلد شي او خپلې تخنیکي او سیالیزې وړتیاوې پیاوړې کړي.
هغې زیاته کړې چې د لوبغاړو د چمتووالي لپاره په بېلابېلو هېوادونو کې تمریناتي کمپونه جوړېږي، څو د لوبډلې غړې د راتلونکو نړیوالو سیالیو لپاره لا ښه همغږي او چمتووالی ترلاسه کړي.
د «افغان متحدو ښځو» د فوټبال لوبډله، چې د افغانستان د ښځینه فوټبال لوبغاړو له ډلې جوړه شوې، د ۲۰۲۵ کال په مې میاشت کې رامنځته شوه. دغې لوبډلې د ۲۰۲۵ کال په اکتوبر او نومبر میاشتو کې د لومړي ځل لپاره د مراکش په کوربتوب د فیفا د ښځو د لړۍ سیالیو کې ګډون کړی و.
د افغانستان د ښځینه فوټبال لوبډلې راتلونکې دوستانه سیالۍ د نړیوالو سیالیو لپاره د دې لوبډلې د چمتووالي او تجربې د لوړولو په برخه کې یو مهم ګام بلل کېږي.
