د تحریک انصاف ګوند د اسمبلۍ غړي: د عمران‌خان د خلاصون لپاره دې اغېزناکه تګلاره جوړه شي

دغه غړو په پېښور کې تر یوې غونډې وروسته د ګوند مشر بیرسټر ګوهر علي خان ته په لېږلي لیک کې ویلي، چې د عمران‌خان د خوشې کېدو روان بهیر محدود او بې‌اغېزې دی او یوازې تر رسمي څرګندونو او سمبولیکه اقداماتو پورې محدود دی.
هغوی ویلي، د عمران‌خان د زنداني کېدو او د هغه روغتیایي وضعیت د ګوند د کارکوونکو او پلویانو ترمنځ اندېښنې زیاتې کړې دي. په لیک کې خبرداری ورکړل شوی، که وضعیت همداسې دوام وکړي؛ نو ګوند ته به سیاسي زیان واوړي.
همداراز د خېبر پښتونخوا د حکومت په چارو کې د لاسوهنې، د وړتیا پر ځای د شخصي ملاحظاتو د زیاتېدو او د سرچینو ناعادلانه وېش په اړه هم اندېښنې څرګندې شوې دي. د یاد ګوند غړو ټینګار کړی، چې حکومتي چارې باید د روڼتیا، وړتیا او د ولسي استازو د مشورو پر بنسټ پر مخ یووړل شي.
دوی د عمران‌خان او د ګوند نورو بندي غړو د قضیو لپاره د منظم حقوقي او سیاسي پلان غوښتنه هم کړې ده. لاتراوسه د ګوند مشرتابه د دغه لیک په اړه رسمي غبرګون نه‌دی ښودلی.