ټرمپ ومنله چې له نتنیاهو سره په ټیلیفوني خبرو کې یې هغه «لیونی» بللی
د امریکا ولسمشر ډونالډ ټرمپ منلې ده چې هغه د لبنان د جګړو په تړاو د یوې ټیلیفوني اړیکې پر مهال، په داسې حال کې چې واشنګټن هڅه کوله له ایران سره د روان کړکېچ په اړه خبرې وکړي، د اسراییل لومړي وزیر بنیامین نتنیاهو ته یې ویلي، چې هغه «لیونی» دی.
د رویټرز د راپور له مخې، ټرمپ د چارشنبې په ورځ د یوې خبري ناستې پر مهال وپوښتل شو چې ایا رښتیا یې نتنیاهو ته «لیونی» ویلي دي که نه.
ټرمپ وویل: «هو، ما دا ویلي دي. زه به نه وایم چې ډېر قهرجن وم، خو زه لږ خپه شوی وم ځکه هغه په دوامداره توګه له لبنان سره جګړه کوله.»
ټرمپ زیاته کړه چې هغه او نتنیاهو له یو بل سره ډېرې ښې اړیکې لري.
مخکې له دې، اکسیوس د یوه امریکایي چارواکي له قوله لیکلي و چې ټرمپ په ټیلیفوني خبرو کې نتنیاهو ته ویلي: «ته لعنتي لیونی یې، که زه نه وای، ته به په زندان کې وې… زه ستا ملاتړ کوم.»
ټرمپ په خبرې ناسته کې زیاته کړه: «ما ورته وویل، بیبي، موږ باید دا ودروو. موږ باید دا پای ته ورسوو.»
