پر ډیورنډ کرښه تړلې لارې؛ د پاکستان سوداګري له ۱.۴ مېلیارد ډالرو ډېره زیانمنه شوې ده
د پاکستان حکومت وایي، له افغانستان سره د لارو تړل پاتې کېدو او د منځني ختیځ د کړکېچ له امله د سمندري لارو د ګډوډېدو له کبله دغه هېواد په سوداګرۍ او ټرانزیټ برخه کې له ۱.۴ مېلیارد ډالرو ډېر زیان لیدلی دی.
پاکستاني چارواکو دغه شمېرې د پاکستان د قامي اسمبلۍ د سوداګرۍ کمېټې ته وړاندې کړې او خبرداری یې ورکړی، چې دواړه ناورينونو د صادراتو او د ټرانزیټ عوایدو لړۍ سخته اغېزمنه کړې ده.
د راپور له مخې؛ له افغانستان سره د لارو تر تړل پاتې کېدو وروسته صادرات له ۸۱۸ مېلیون ډالرو ۸۵ مېلیون ډالرو ته راټیټ شوي او تر ۷زره او ۵۰۰ زیات کانټینرونه بند پاتې شوي دي. همدارنګه د منځنۍ اسیا هېوادونو لپاره د ټرانزیټ عواید هم په بشپړه توګه درېدلي دي.
چارواکي وایي، یوازې د افغانستان لارې تړل پاتې کېدو پاکستان ته شاوخوا ۸۰۵ مېلیون ډالره زیان اړولی دی.
ورته مهال د فارس خلیج د لارو ګډوډۍ له امله چې له سیمهییزو کړکېچونو سره تړاو لري، د پاکستان د صادراتو لړۍ هم اغېزمنه کړې ده. پاکستاني چارواکي خبرداری ورکوي، که وضعیت همداسې دوام وکړي؛ نو یوازې په خلیجي بازارونو کې به د پاکستان صادرات سلګونه مېلیون ډالره کم شي.
د پاکستان حکومت ویلي، چې د دغه زیان د کمولو لپاره یې د بدیلو لارو کارول، د هوايي بار وړلو زیاتول او د ایران او منځنۍ اسیا له لارې د ټرانزیټ هڅې پیل کړې دي. دغه راپور داسې مهال خپرېږي، چې دامهال د سیمې سوداګریزې لارې د سیاسي او امنیتي کړکېچونو له امله له جدي ننګونو سره مخ دي.
