د کندوز یو اوسېدونکی: د طالبانو استخبارات بېګناه کسان نیسي او بډې ترې اخلي
د کندوز یو اوسېدونکی چې د طالبانو په زندان کې بندي وو؛ له زندانه تر خوشې کېدو وروسته یې افغانستان انټرنشنل ته ویلي، چې د طالبانو زندانونه له بېګناه وګړو ډک دي او طالب استخبارات ترې بډې اخلي.
نوموړي زیاته کړې، چې د طالبانو په زندانونو کې «ظلم، فساد او رشوت» په پراخه کچه دوام لري. د هغه په خبره؛ طالب استخبارات عام وګړي په بېلابېلو تورونو نیسي او زنداني کوي یې.
هغه زیاته کړې، چې زندانونه له بېګناه خلکو ډک دي: «زه د کندوز یو اوسېدونکی یم، څه موده د طالبانو په زندان کې بندي وم. په افغانستان کې د طالبانو له زندانونو او حوزو شکایت لرم، استخبارت له شواهدو پرته خلک د بېلابېلو تورونو په تړاو نیسي، زندانونه له بېګناه خلکو ډک دي».
د ۲۰۲۱کال له اګست وروسته د طالبانو تر کنټرول لاندې د زندانونو وضعیت څو ځله د کورنیو او نړۍوالو بنسټونو د بحث موضوع ګرځېدلې ده. د بندیانو کورنیو او د بشري حقونو ځینو سازمانونو د خپلسرو نیونو او د بندیانو د حقونو سرغړونې په اړه اندېښنې څرګندې کړې دي؛ خو طالبان بیا وایي چې ټولې چارې د قانون او شریعت له مخې ترسره کېږي.
