روسیې پر اوکراین تورلګولی چې په ډرون برید کې یې ۸ ملکي کسان وژلي
روسیې د چارشنبې په ورځ اوکراین تورن کړ چې د ډرون برید په ترڅ کې یې اته ملکي وګړي وژلي او ۱۱ نور یې ټپیان کړي دي. مسکو وايي، برید د روسیې تر کنټرول لاندې د ختیځ اوکراین په دونېڅک سیمه کې پر یوه مسافر وړونکي بس شوی.
د روسیې له خوا ټاکل شوي د دونېڅک مشر ډینیس پُشیلین ویلي چې ویشتل شوی بس له مسکو څخه دکریمیا سیمفروپول سیمې ته پر لاره و.
د روسیې د بهرنیو چارو وزارت ویاندې ماریا زاخارووا دا برید د اوکراین له خوا د ملکي وګړو «ښکار» بللی او د دغه وزارت ځانګړي استازي رودیون میروشېنک ویلي چې دا برید د خلکو د وېرولو لپاره شوی دی.
له بلې خوا، روسیې د سې شنبې په ورځ پر اوکراین پراخ ډرون او توغندیز بریدونه کړي چې په پایله کې یې ۲۳ کسان وژل شوي او ۱۳۰ نور ټپیان شوي دي.
