بولټن د محرمو اسنادو په قضیه کې څه باندې دوه میلیونه ډالره جریمې ورکولو ته چمتو شوی
جان بولټن، چې د امریکا د ولسمشر ډونالډ ټرمپ له مخکښو منتقدانو څخه دی او پخوا یې د هغه د ملي امنیت د سلاکار په توګه دنده ترسره کړې، د محرمو اسنادو د ناسم مدیریت اړوند تورونو د هواري لپاره به ۲،۲۵ میلیونه ډالره جریمه ورکړي.
رویټرز د پنجشنبې په ورځ د درېیو باخبره سرچینو په حواله راپور ورکړی چې بولټن د دې قضیې د حل په موخه له اړوندو تورونو سره د جوړجاړي لپاره د یادې جریمې ورکولو ته چمتو شوی دی.
بولټن به د جون په ۲۶مه د محکمې په غونډه کې د محرمو معلوماتو د ساتلو اړوند یوه تور په تړاو پر جرم اعتراف وکړي.
پر بولټن تور دی چې د یوه کتاب د لیکلو پر مهال یې خپلو دوو خپلوانو ته حساس معلومات ورکړي وو، څو ښايي په کتاب کې ترې ګټه واخیستل شي. په دغو معلوماتو کې د استخباراتي غونډو یادښتونه او د لوړپوړو حکومتي چارواکو او بهرنیو مشرانو د لیدنو کتنو یادښتونه شامل وو. هغه تېر کال په ۱۸ جنايي تورونو کې ځان بېګناه بللی و.
بولټن د ډونالډ ټرمپ د لومړۍ دورې پر مهال د سپینې ماڼۍ د ملي امنیت د سلاکار په توګه دنده ترسره کړې وه، خو وروسته د ټرمپ له تر ټولو سختو منتقدانو څخه شو. نوموړي په خپلو خاطراتو کې ټرمپ د ولسمشرۍ لپاره نامناسب کس بللی و.
یوې بلې سرچینې، ویلي چې د جرم منلو په تړون کې د بولټن د کتاب په تړاو د ناسم عمل ادعا نه ده شوې، خو بولټن منلې چې یوه تېروتنه یې کړې وه.
