د پنجشېر لپاره د طالبانو د رسنیو دفتر مسوولین وايي، په تېرو درېیو کلونو کې ۱۶۵ دښمنۍ پر سولې بدلې شوې دي. د دوی په وینا، په دې سره په یادو دښمنیو کې ښکېلې لسګونه کورنۍ بېرته خپلې مېنو ته ستنې شوې دي.
د پنجشېر ولایت لپاره د طالبانو د رسنیو دفتر د پنجشنبې په ورځ (د غبرګولي ۱۴مه) د یوې خبرپاڼې په خپرولو سره ویلي، په دې دښمنیو کې قتل، ذاتالبیني خصومتونه، حقوقي او ورته نور مسایل شامل وو او په وینا یې د دغو دښمنیو مخینه له ۱۵ تر شلو کلونو پورې رسېده.
ځايي طالب مسوولین ادعا لري: «په تېر رژیم کې تفرقې اچونې د هغو چارواکو لپاره د سرتېرو د جذب زمینه برابره کړې وه، چې لاسونه یې د پنجشېر د خلکو په وینو سره وو، خو د افغانستان د اسلامي امارت په واکمنۍ سره، دغو دښمنیو ته په بشپړه توګه د پای ټکی اېښودل شوی او د ټول پنجشېر د اوسېدونکو ترمنځ د یووالي او اتحاد د رامنځته کېدو زمینه برابره شوې ده».
په خبرپاڼه کې راغلي، دغه دښمنۍ د پنجشېر په ۷ ولسوالیو کې وې او پر سولې د یادو دښمنو له بدلېدو وروسته لسګونه هغه کورنۍ چې د خپلو مېنو پرېښودو ته اړې شوې وې، بېرته خپلو مېنو ته هم ستنې شوې دي.
د یادونې وړ ده، چې په دې دښمنیو کې یوازې ۳۰ د قتل پېښې وې او د دښمنۍ په موده کې په هرې دښمنۍ کې له ښکېلو خواو تر څلور کسان هم په قتل رسېدلي وو.
