طالبانو سره د ورزشي همکاریو پراختیا؛ داغستان افغانستان ته د ورزشکارانو د لېږلو ژمنه کړې
د طالبانو تر ادارې لاندې د المپیک، بدني روزنې او سپورټ ادارې مشر مولوي احمدالله وثیق، د روسیې په سنټ پترزبورګ ښار کې د نړیوال اقتصادي فورم په څنډه کې د داغستان جمهوریت د ورزش له وزیر ساجد سره د ورزشي همکاریو او دوهاړخیزو اړیکو د پراختیا په اړه خبرې کړې دي.
د المپیک، بدني روزنې او سپورټ ادارې د خبرپاڼې له مخې، په دې لیدنه کې د دواړو لورو ترمنځ د ورزش په بېلابېلو برخو کې د همکاریو پر پراختیا، د ورزشکارانو د ظرفیت لوړولو او د ګډو تمریناتي پروګرامونو پر پلي کېدو بحث شوی دی.
د خبرپاڼې له مخې، د داغستان د ورزش وزیر ویلي چې هېواد یې چمتو دی د ځینو ورزشي څانګو ورزشکاران افغانستان ته واستوي، څو له افغان ورزشکارانو سره ګډ تمرینات ترسره کړي او د ظرفیت لوړونې په موخه دوستانه سیالۍ هم ولري.
هغه ټینګار کړی چې دا ډول ورزشي تبادلې کولای شي د دواړو لورو د ورزشکارانو د تجربو په شریکولو او د ورزشي اړیکو په پیاوړتیا کې مهم رول ولوبوي.
