د یمن د اطلاعاتو وزیر: حوثـ .ـیان د ایران د بهرني پوځي او امنیتي جوړښت برخه ده
د یمن د اطلاعاتو وزیر معمر الاریانی ویلي، چې د عربي خلیج هېوادونو پر ضد د ایران د بریدونو هرکلی د حوثـ .ـیانو او تهران ترمنځ د ژورې اړیکې او بشپړې همغږۍ څرګندونه کوي.
الاریاني د پنجشنبې په ورځ په ایکس خواله رسنۍ کې لیکلي چې حوثیانو د عربي خلیج هېوادونو، په ځانګړي ډول د کویټ نړیوال هوایي ډګر پر وړاندې د ایران د بریدونو ملاتړ کړی، چې د نوموړي په وینا دا چاره ښيي چې دغه ډله د تهران له سیاستونو سره بشپړه تړاو لري او د سیمې له ګډو ګټو او عربي هویت څخه لرې شوې ده.
هغه زیاته کړې چې حوثیانو د عربي خلیج هېوادونو د امنیت، ثبات او حیاتي بنسټونو پر ضد بریدونه د غندلو پر ځای توجیه او ستایلي دي. د یمن د اطلاعاتو وزیر په وینا، د حوثیانو دریځونه څرګندوي چې دغه ډله د تهران په ژبه خبرې کوي او د هغو تګلارو پیروي کوي چې د ایران حکومت یې د خپلو سیمهییزو متحدانو د مدیریت لپاره کاروي.
الاریاني ویلي چې د حوثیانو دا چلند ثابتوي چې هغوی یوازې د ایران متحدان نه دي، بلکې د ایران د بهرني پوځي، امنیتي او سیاسي جوړښت یوه برخه ګڼل کېږي.
د نوموړي په وینا، حوثیانو یمن د داسې پروژو او سیاستونو د عملي کولو په ډګر بدل کړی چې د ایران له سیمهییزو موخو سره تړاو لري او د یمن د خلکو له ګټو او د سیمې له ثبات سره په ټکر کې دي.
د یمن د اطلاعاتو وزیر ټینګار کړی چې د حوثیانو وروستي دریځونه او اقدامات د سیمې د امنیتي وضعیت په اړه اندېښنې زیاتوي او د عربي هېوادونو پر وړاندې د هغوی د سیاسي او پوځي تمایلاتو څرګندونه کوي.
