د خېبر پښتونخوا سر وزیر د پاکستان قامي اسمبلۍ مخې ته د پرلت ګواښ وکړ
د خیبر پښتونخوا سر وزیر سهیل اپریدي خبرداری ورکړی، که د پاکستان تحریک انصاف ګوند له بنسټګر عمران خان سره پر ملاقات بندیز دوام وکړي؛ نو د ګوند وکیلان او استازي به (د جون په ۱۰مه) د پاکستان د قامي اسمبلۍ مخې ته پرلت ووهي.
اپریدي د سېشنبې په ورځ د راولپنډۍ اډیاله زندان مخې ته له رسنیو سره په خبرو کې وویل، چې هغه ته له عمران خان سره د لیدنې اجازه ورنه کړل شوه. نوموړي زیاته کړه، که دغه وضعیت دوام وکړي؛ نو د فدرالي بودجې د تصویب بهیر به هم له خنډ سره مخ شي.
د خیبر پښتونخوا سر وزیر غوښتنه وکړه، چې هغه او د ایالتي مالي سلاکار ته دې له عمران خان سره د لیدنې اجازه ورکړل شي؛ څو د راتلونکي مالي کال د بودجې وړاندیزونه ورسره شریک او د هغه مشورې ترلاسه کړي.
هغه وویل، د خیبر پښتونخوا حکومت د عمران خان د سیاسي نفوذ او ولسي ملاتړ پر بنسټ واک ته رسېدلی او له همدې امله د بودجې په مهمو پرېکړو کې د هغه نظر اخیستل اړین دي.
د یادونې وړ ده، چې نوموړي له عمران خان سره د لیدنې د اجازې ترلاسه کولو لپاره د اسلاماباد سترې محکمې ته عریضه وړاندې کړي.
نوموړي ادعا وکړه، چې عمران خان لاهم په محدودو شرایطو کې ساتل کېږي او باید د خپلو شخصي ډاکټرانو تر څار لاندې د شفا نړۍوال روغتون کې د درملنې اسانتیا ورته برابره شي.
هغه همداراز د عمران خان له کورنۍ، د ګوند له مشرانو او شخصي ډاکټرانو سره د لیدنو پر دوامداره بندیز اندېښنه څرګنده کړه او ویې ویل، چې دغه وضعیت د شکونو او اندېښنو لامل ګرځي.
