د پاکستان په سند ایالت کې د سخت باد، توپان او باران له امله شپږ کسان مړه شوي
د پاکستان د سند ایالت په شهید بېنظیراباد ولسوالۍ کې د سختو دوړو، توپان او شړکنده باران له امله د ښځو او ماشومانو په ګډون لږترلږه شپږ کسان مړه شوي دي. د یادې ولسوالۍ د اطلاعاتو ادارې ویلي، دغه کسان د کورونو چتونو او دېوالونو نړېدو له امله مړه شوي دي.
ځایي چارواکي وایي، د پېښې ټپیان او مړي نږدې روغتیايي مرکزونو ته لېږدول شوي. د راپورونو له مخې؛ سخت توپان د برېښنا ستنې او د لېږد مزي هم نړولي، چې له امله یې ټوله سیمه د شپې لهخوا له برېښنا بېبرخې شوې ده.
همداراز په نوابشاه ښار او د نوشهروفېروز، کنډیارو، مورو، بندهي، ډاور او شاوخوا سیمو کې ګڼې ونې، د لمریزې برېښنا هېندارې او د اعلاناتو لیکدړې هم زیانمنې شوې دي. ځايي چارواکي وایي، توپان او باران خلکو ته پراخ مالي زیانونه اړولي دي.
