د مالدیف پر وړاندې تر بریا وروسته؛ افغان لوبډله نن د بنګلهدېش پر وړاندې لوبه کوي
د افغانستان د فوټبال ملي لوبډله به نن پنجشنبه (د غبرګولي ۱۴مه) په مالدیف کې د «ډایمنډ جوبېلي» نړۍوالو څلور اړخیزو سیالیو پر دوام په خپله دویمه لوبه کې له بنګلهدېش سره مخ شي. دغه لوبه به د کابل په وخت د شپې په ۸:۳۰ بجو د مالدیف په پلازمېنه ماله ښار کې ترسره شي.
افغان لوبډلې دغه سیالۍ له یوې ارزښتناکه بریا سره پیل کړې، چې په خپله لومړۍ لوبه کې یې کوربه لوبډلې مالدیف ته د ۱-۰ په توپیر ماتې ورکړه. په یاده لوبه کې رومان فضلي د افغانستان لپاره یوازینی ګول په ۸۰مه دقیقه کې وواهه، چې ملي لوبډلې ته یې درې مهمې نمرې ورکړې.
له دغه بریا سره افغانستان د سیالیو د جدول په سر کې دی او اوس هیله لري، چې د بنګلهدېش په وړاندې د یوې ښې پایلې په ترلاسه کولو سره د پای لوبې په لور یو لوی ګام پورته کړي.
د «ډایمنډ جوبېلي» سیالۍ د افغانستان، مالدیف، پاکستان او بنګلهدېش د ۲۳ کلنو ملي لوبډلو په ګډون به د غبرګولي له ۱۱مې تر ۲۰مې پورې په مالدیف کې ترسره شي. له بنګلهدېش سره تر لوبې وروسته د افغانستان ملي لوبډله به (د غبرګولي ۱۷مه) د ډلهییزو لوبو په درېیمه او وروستۍ لوبه کې له پاکستان سره مخ شي.
د افغانستان پاتې لوبې:
• افغانستان د بنګلهدېش په وړاندې؛ د غبرګولي ۱۴مه
• افغانستان د پاکستان په وړاندې؛ د غبرګولي ۱۷مه
• پای لوبه؛د غبرګولي ۲۰مه
