د حماس د سیاسي دفتر غړي حسام بدران ویلي، د دوی ډله به په اوسنیو شرایطو کې خپلې وسلې تسلیم نه کړي. نوموړي له الجزیره تلویزیون سره په یوه ځانګړې مرکه کې ویلي چې د حماس د وسلو د راتلونکي او وروستي برخلیک په اړه پرېکړه به له نورو فلسطیني ډلو سره تر هراړخیزو خبرو اترو وروسته وشي.
بدران د نورو جزییاتو له ورکولو پرته ټینګار کړی چې د وسلو د سپارلو موضوع د فلسطیني ډلو ترمنځ د ګډو بحثونو او تفاهم له لارې ټاکل کېږي.
د ایران دولتي رسنیو د دغه هیواد د پوځ عامه اړیکو د دفتر له قوله راپور ورکړی چې د عمان په خلیج کې یې د امریکا پر سمندري کښتیو خبرداری ورکوونکي توغندي او بې پیلوټه الوتکې بریدونه کړي دي.
د ایران پوځ ویلي چې دغه سمندري بېړۍ چې د DDG-103 او DDG-87 په نوم پېژندل کېږي، له دې اقدام وروسته د عمان سمندر پرېښی او د هند سمندر پر لور تللي دي.
د ایران د پوځ د سمندري ځواکونو مرکز ویلي، که اړتیا وي نو له لا اوږد واټن ویشتونکو توغندیو څخه به هم ګټه واخلي.
له بلې خوا، د امریکا سمندري قوماندانۍ ویلي: «موږ به د ناقانونه شبکو د ګډوډولو او د هغو بېړیو د درولو لپاره چې ایران ته مادي ملاتړ برابروي، په ټوله نړۍ کې سمندري اجراتو ته دوام ورکړو، هغه که هر ځای وي.»
دا په داسې حال کې ده چې د ایران شاوخوا د سمندري امنیت په اړه ترینګلتیاوې زیاتې شوې او واشنګټن د ایران ته د تېلو لیږد بندیزونه عملي کوي چې تهران بیا څو ځله د هرمز تنګي او شاوخوا اوبو کې د بېړیو د تګ راتګ د ګواښ خبرداری ورکړی دی.
اوکرایني چارواکو ویلي، چې د پلازمېنې کیف په شاوخوا سیمه کې د ماشومانو د خوړو د تولید پر یوه فابریکه د روسیې د بېپیلوټه الوتکو په برید کې څلور کسان وژل شوي او اووه نور ټپیان دي.
د کییف والي میکولا کلاشینیک پر ټیلیګرام لیکلي چې په نښه شوې فابریکه کې د ماشومانو لپاره مستې او نور لبنیات تولیدېدل.او بیړنیو خدماتو ډلو په ساحه کې اور مړ کړی دی.
په ورته مهال د اوکراین ولسمشر ولادیمیر زېلېنسکي پر اېکس په سخت غبرګون کې ویلي، چې د روسیې د وروستیو بریدونو په لېست کې اوس د ماشومانو د خوړو د تولید دغه کارخانه هم شامله شوه. زیلنسکي زیاته کړې چې روسي ځواکونو په ورته وخت کې په دایپروپیتروفسک کې د خوړو پر ګودامونو او پوستي مرکز، په خرسون کې پر یوه امبولانس، په سومي کې پر یوه ښوونځي، په اودیسا کې د بندر پر زیربناوو او په خارکیف کې پر یوه کلینیک هم بریدونه کړي دي.
د اوکراین ولسمشر یو ځل بیا له نړیوالې ټولنې وغوښتل چې د هېواد د هوايي دفاع په پیاوړتیا او پر مسکو د اقتصادي او د بندیزونو د فشارونو په ساتلو کې مرسته وکړي ترڅو دغه جګړه چې اوس یې پېنځم کال روان دی، پای ته ورسېږي. هغه وویل، د بالستیک ضد دفاعي ملاتړ او د وسلو په تولید کې ګډې هوکړې د خلکو ژوند ژغورلی شي.
د ناټو د «۲۰۲۶کال بالتوپس» په نوم د بالتیک عملیاتو ۵۵م پړاو د پنجشنبې په ورځ (د غبرګولي ۱۴مه) د پولنډ د ګدنیا له بندر نه د ناټو د غړو هېوادونو د ۲۰ بېړیو په وتلو سره پیل شو. دغه پوځي تمرین د امریکا د سمندري ځواکونو د شپږمې بېړۍ ډلې په مشرۍ ترسره کېږي.
بالتوپس د بالتیک سمندرګي په سیمه کې د ناټو تر ټولو مهم کلنی سمندري پوځي تمرین ګڼل کېږي، چې موخه یې د عملیاتي همغږۍ پیاوړتیا، د جګړهییز چمتووالي لوړول او د ناټو ځواک پراخول دي.
دغه تمرین داسې مهال ترسره کېږي، چې په منځني ختیځ کې د ایران او امریکا ترمنځ سیاسي او پوځي ترینګلتیا روانه ده او په بېلابېلو سیمو کې د خپل پوځي حضور پر پیاوړتیا ټینګار کوي.
د پولنډ د سمندري ځواکونو مفتش یاروسواف زیمېنسکي د تمرین له پیل وړاند په یوې خبري غونډه کې وویل: «بالتوپس یوازې یو تمرین نه؛ بلکې زموږ د یووالي او د ګډو ژمنو د پوره کولو لپاره د چمتووالي څرګندونه ده».
دغه تمرین له ۱۹۷۲کال راهیسې د لومړي ځل لپاره د ناټو د ګډو ځواکونو د قوماندانۍ لهخوا چې د هالنډ په برونسوم ښار کې موقعیت لري، تر قوماندې او کنټرول لاندې ترسره کېږي. د یادې قوماندانۍ مرستیال جان مید ویلي، بالتوپس د روسیې د احتمالي ګواښونو پر وړاندې د عملیاتي چمتووالي لوړولو او د ناټو ټلوالې د لا زیاتې همغږۍ لپاره ترسره کېږي.
ټاکل شوې ده، چې په راتلونکو دوو اوونیو کې د امریکا او د ناټو د متحده هېوادونو ځواکونه د اوبو او وچې ګډ عملیات، هوايي دفاع او د اوبتل ضد جګړې په ګډون په بېلابېلو برخو کې پوځي تمرینونه ترسره کړي.
په دغه ستر پوځي تمرین کې د امریکا په ګډون د ۱۵ هېوادونو شاوخوا ۶زره سرتېري برخه لري.
د روسیې او ازبکستان ولسمشرانو ولادیمیر پوتین او شوکت میرضیایف په ګډ فرمان سره په ازبکستان کې د اټومي انرژۍ مرکز د جوړولو چارې په رسمي ډول پیل کړې. د یادې پروژې د پرانیستې په مراسمو کې د اټومي انرژۍ د نړۍوالې ادارې (IAEA) عمومي رییس رافایل ګروسي هم ګډون لاره.
دغه پروژه چې د ازبکستان د جیزک په سیمه کې جوړېږي، د نړۍ په کچه یوه ځانګړې پروژه بلل شوې؛ ځکه د لومړي ځل لپاره به په یوه ساحه کې هم د ټیټ ظرفیت لرونکي او هم د لوړ ظرفیت لرونکي اټومي ریاکټورونه په یو وخت جوړ شي.
د اټومي انرژۍ د نړۍوالې ادارې د معیارونو له مخې؛ د بنسټیز کانکریټ اچونې له پیل سره دغه پروژه په رسمي ډول د جوړېدو پړاو ته رسېدلې. پوتین په خپلو څرګندونو کې وویل، چې دغه پروژه به نه یوازې د ازبکستان د انرژۍ امنیت پیاوړی کړي؛ بلکې د منځنۍ اسیا ټولې سیمې ته به هم ګټه ورسوي.
د ازبکستان ولسمشر شوکت میرضیایف دغه اقدام تاریخي بللی او ویلي یې دي، چې دغه پروژه به د دغه هېواد د علمي، صنعتي او ټېکنالوژۍ پرمختګ نوی فصل پرانیزي. هغه ټینګار کړی: «امنیت زموږ مطلق او نه بدلېدونکی لومړیتوب دی او د جوړولو ټول پړاوونه به د اټومي انرژۍ د نړۍوالې ادارې تر دوامداره څار لاندې ترسره شي».
د روسیې دولتي اټومي شرکت «روساتوم» ژمنه کړې، چې د برېښناکوټ د جوړولو ترڅنګ به د سون توکو برابرول، تخنیکي ملاتړ او د ساتنې خدمات هم وړاندې کړي.
د اټومي انرژۍ د نړۍوالې ادارې عمومي ریس رافایل ګروسي د یادې پروژې هرکلی کړی او ویلي دي: «دغه پروژه د کوچنیو اټومي ریاکټورونو له ټېکنالوژۍ ګټه اخلي. هغه ټېکنالوژي چې د نړۍ یوازې محدود شمېر هېوادونه یې لري. اداره به د جوړولو او فعالیت په ټولو پړاوونو کې د خوندیتوب، فزیکي امنیت او د اټومي وسلو د نه خپرېدو د تضمین لپاره له یادې پروژې سره همکاري وکړي».
د روساټوم او اوزاتوم د اعلان شویو پلانونو له مخې؛ د RITM-200N کوچني ریاکټورونه به د ۲۰۲۹ زېږدیز کال تر پایه ګټې اخیستنې ته وسپارل شي. همداراز د VVER-1000 لوی ریاکټورونه به په تدریجي ډول د ۲۰۳۳ او ۲۰۳۵ کلونو ترمنځ بشپړ شي او اټومي انرژي به خپل بشپړ ظرفیت ته ورسېږي.
خو د دغه مهالوېش عملي کېدل د پروژې د بېځنډه پرمختګ، د خوندیتوب د معیارونو رعایت او د نړۍوالو جوازونو ترلاسه کولو پورې تړلي دي.
د اسراییل پوځ اعلان کړی، چې د غزې په شمال کې یې د هوا او سمندر له لارې په یوه ګډ برید کې د حماس د عامه امنیت ادارې یوشمېر لوړپوړي چارواکي په نښه کړي او وژلي دي. اسراييل ویلي، چې دغه عملیات د کورني امنیت ادارې «شاباک» په همکارۍ ترسره شوي دي.
د اسراییل پوځ په وینا؛ د حماس د عامه امنیت اداره یو مهم او پټ امنیتي بنسټ دی، چې د یادې ډلې د مشرانو د امنیت، د هغوی د اړیکو او غونډو د همغږۍ او همدارنګه د استخباراتي معلوماتو د راټولولو مسوولیت لري.
یاد پوځ ویلي، چې دغه عملیات د اسراییل د کورني امنیت ادارې (شاباک) په همکارۍ ترسره شوي دي. د اسراییلي پوځ د معلوماتو له مخې؛ په دغه برید کې د حماس د عامه امنیت د مشر مرستیال حسن رباح حسن لبد او همدارنګه عصام امین شلاش شبیر، عبدالله عطا یونس ابو کلوب او محمد نعمان زکي ابو مرق چې د یادې ادارې لوړپوړي چارواکي بلل شوي؛ وژل شوي دي.
اسراییلي پوځ ویلي، چې دغه کسان د حماس د تشکیلاتو د بیارغونې او د یادې ډلې د فعالیتونو د ملاتړ له امله په نښه شوي دي. نوموړي پوځ زیاته کړې، تر برید وړاندې د ملکي وګړو د احتمالي زیان د کمولو لپاره لازم تدابیر نیول شوي وو چې د دقیقو وسلو کارول او هوايي څارنه هم پهکې شامله وه.
د اسراییل پوځ ویلي، چې ځواکونه یې د سویلي قوماندانۍ تر مشرۍ لاندې په سیمه کې ځای پرځای شوي او د هر ډول احتمالي ګواښ د لهمنځه وړلو لپاره خپلو عملیاتو ته دوام ورکوي.