د پاکستان پي ای اې هوايي شرکت بیجینګ ته مستقیمې الوتنې پیلوي
د پاکستان «پي ای اې» هوايي شرکت اعلان کړی، چې راتلونکې میاشت بیا ځلي د اسلاماباد او بجینګ ترمنځ مستقیمې الوتنې پیلوي. یاد شرکت ویلي، چې دغه پرېکړه یې په چین کې د مېشتو پاکستاني محصلینو، سوداګرو او ګرځندویانو د غوښتنو په ځواب کې کړې ده.
د پاکستان دولتي راډیو د راپور له مخې، د دواړو هېوادونو ترمنځ د تګ راتګ د اسانتیا لپاره د دغو الوتنو پیلېدل خورا اړین وو.
پاکستان یاد هوايي شرکت ویلي، چې د دې پرېکړې له مخې به د مساپرو لپاره د سفر لګښت او وخت خورا کم شي.
«پي ای اې» هوايي شرکت وړاندې دولتي و او سختو مالي ستونزو سره مخ شو. د یاد هوايي شرکت د ونډو دېره برخه خصوصي سکتور ته انتقال شوې ده.
