کابل مېشتی: د طالبانو د اسنادو په محکمه کې درغلي او نا غیړي شته
یو کابل مېشتي افغانستان انټرنشنل ته په لېږلي پیغام کې ویلي، چې د کابل د جنګلک په سیمه کې د طالبانو تر واک لاندې د اسنادو او وثیقو د محکمې کارکوونکي د کار پرمهال له خلکو سره ناسم چلند کوي او کارونه په ډېر ځنډ مخ ته وړي.
دغه اوسېدونکي زیاته کړې، چې خلک د دغه محکمې د کارکوونکو له چلند ستړي شوي؛ ځکه عادي چارې میاشتې او کلونه وخت نیسي، درانه لګښتونه، واسطه او د بډې اخیستل پهکې خورا زیات دي.
د نوموړي په خبره؛ ډېری وخت د یادې ادارې کارکوونکي خلکو ته سپکاوی هم کوي. هغه زیاته کړې: «له واسطې، کمېشن کارۍ او د پیسو له ورکړې پرته په دغه محکمه کې هيڅ کار پر مخ نه ځي».
دغه کابل مېشتي ویلي، که د طالبانو تر واک لاندې په دولتي ادارو کې دغه ډول وضعیت دوام وکړي؛ نو په داسې یو وضعیت کې دغه ډله څنګه له بهر مېشتو افغانانو غواړي، چې بېرته دې افغانستان ته ستانه شي.
