د کندهار اوسېدونکی: د سپين بولدک او چمن پر دروازه له ناروغانو ناقانونه پیسې اخیستل کېږي
د کندهار د سپين بولدک ولسوالۍ یو اوسېدونکي افغانستان انټرنشنل ته په یوه لېږلي پيغام کې ویلي، چې د سپین بولدک او چمن پر دروازه له ناروغانو پېسې اخیستل کېږي او ځورول کېږي. نوموړي ادعا کړې، چې د پاکستان په زندانونو کې افغان مېرمنې جنسي ځورول کېږي.
دغه کس په خپل غږیز پیغام کې ویلي، تازه د چهارشنبې د ورځې د سترګو لیدلی حال شریکوي او زیاتوي چې ځینې کسان له ناروغانو څخه تر یو لک کلدارو اخلي؛ ترڅو پاکستان ته یې واړوي. د هغه په خبره؛ دغه انساني چاقاق کوونکي د طالبانو او پاکستاني پولیسو سره اړیکې لري او دواړه خواوو ته خپله ونډه ورکوي.
نوموړي زیاته کړې: «ډېری وخت چې پاکستاني پوځيان راشي، د پیسو برخه نه وي ورکول شوې بیا افغانې مېرمنې وهي، ظلم ورسره کوي، زندانونو ته یې وړي او ان هلته یې جنسي ځوروي». هغه ادعا کړې، چې د جنسي ځورولو څو قضیې یې لیدلې او خلک له مجبوریته غږ نهشي اوچتولی.
هغه د دواړه خواوو له مسوولو چارواکو د یادې ستونزې د څار او مخنیوي غوښتنه کړې ده.
