د تخار یو اوسېدونکی: د کوکچې مواصلاتي لارې خرابوالي خلک له ګڼو ستونزو سره مخ کړي دي
د تخار ولایت د کوکچې سیمې یوه اوسېدونکي افغانستان انټرنشنل ته په استول شوي پیغام کې ویلي، چې د کوکچې هاخوا سیمو مواصلاتي سړک له کلونو راهیسې په ډېر خراب وضعیت کې دی او د سیمې خلک یې له ګڼو ستونزو سره مخ کړي دي.
د نوموړي په وینا؛ د سړک خرابوالي د ناروغانو، زدهکوونکو، بزګرانو او مساپرو لپاره جدي ستونزې رامنځته کړې دي. هغه زیاتوي، چې د کلونو په تېرېدو لاهم د دغه لارې د بیارغونې او ترمیم لپاره جدي اقدام نهدی شوی.
د سیمې اوسېدونکو له طالبانو او اړونده ادارو غوښتي، چې د خلکو ستونزو ته رسېدنه وکړي او ژر تر ژره د دغه سړک د بیارغونې چارې پیل کړي. دوی ټینګار کوي، چې مناسبو لارو ته لاسرسی د خلکو بنسټیز حق دی او د معیاري بنسټیزو زېربناوو له جوړېدو پرته د سیمې پرمختګ ناشونی دی.
د یادونې وړ ده، چې په وروستیو میاشتو کې د افغانستان په شمالي ولایتونو کې سختو بارانونو او سېلابونو د ګڼو سیمو مواصلاتي لارې زیانمنې کړې دي. د دغه طبیعي پېښو له امله سړکونه، پلچکونه او ځینې عامه تاسیسات ویجاړ شوي چې د خلکو پر تګراتګ او ورځني ژوند یې منفي اغېز کړی دی.
ځايي اوسېدونکي وايي، د سېلابونو له امله هغه لارې چې له وړاندې هم په نامناسب وضعیت کې وې لا ډېرې خرابې شوې دي. د دوی په باور، د زیانمن شویو سړکونو بیارغونه او ترمیم نه یوازې د خلکو د تګراتګ ستونزې کمولی شي؛ بلکې د سیمو د اقتصادي او ټولنیز پرمختګ لپاره هم اړین ګڼل کېږي.
