د پاکستان په کراچۍ ښار کې د پاخه عمر یو کس، چې په یوه ویډیویي پیغام کې یې ویلي، خپله ښځه یې وژلې ځکه چې هغې ورسره له کوروالي کولو څخه انکار کړی وو. محکمې پولیسو ته امر کړی، چې دغه کس په توقیف کې وساتي.
د پنجشنبې په ورځ (د غبرګولي ۱۴مه) د دغه کس ویډیو په ټولنیزو رسنیو خپره شوه، چې پهکې هغه وايي: «خپله ښځه مې وژلې، ځکه چې هغې راسره له کوروالي کولو څخه انکار وکړ».
دا پېښه د کراچۍ ښار د اورنګي ټاون په سیمه کې رامنځته شوې ده.
دغه کس، چې خپل عمر ۶۴ کاله ښيي، په یوه پولیس تاڼه کې ولاړ دی. ویډیو یې همدغلته ثبت شوې او وروسته په ټولنیزو رسنیو خپره شوې ده.
دغه سپینږیري ویلي، ښځه یې ۵۸ کلنه وه. د هغه په وینا، کله چې هغې ورسره له کوروالي کولو څخه انکار وکړ، نو ده د اوسپنې په ډنډه ووهله او ځای پر ځای یې کړه.
نوموړی وروسته خپله پولیسو ته ورغی او هغوی ته یې ويلي، چې خپله ښځه یې وژلې او مړی یې په کور کې پروت دی.
د کراچۍ پولیسو ویلي، د دغه کس پر ضد قضیه د پولیسو له خوا ثبت شوې، ځکه چې لوڼو یې د دعوې له ثبتولو ډډه کړې ده.
پولیسو نوموړی د جمعې په ورځ (د غبرګولي ۱۵مه) محکمې ته وړاندې کړ او محکمې بیا پولیسو ته امر وکړ، چې هغه په توقیف کې وساتي. پولیسو زیاته کړې، چې د پېښې په اړه یې نورې پلټنې هم پیل کړې دي.
