د برېتانیا یوې محکمې د انګلستان ختیځ اسکس ولایت د یوې ډلې څو غړي د افغان کډوالو د ناقانونه لېږد او د پیسو مېنځلو په جرمونو کې مجرم پېژندلي دي. د معلوماتو له مخې؛ دغه ډلې په ۲۰۱۹کال کې د یوې لارۍ پرمټ د افغان سېک کډوالو یوه ډله له فرانسې نه برېتانیا ته قاچاق کړې وه.
برتانوي چارواکي وايي، د ۲۰۱۹کال (د سپټمبر په ۷مه) د لندن لوېدیځ کې د اوسترلي کرېکټ کلب ته څېرمه یوه لارۍ ودرول شوه چې پهکې د یوه ۱۲ کلن ماشوم په ګډون ۱۲ کسان د لارۍ په پټه برخه کې پټ ساتل شوي وو.
د څېړنو له مخې؛ لارۍ له اسکس نه فرانسې ته تللې او وروسته د چینل تونل له لارې بېرته برېتانیا ته ستنه شوې وه. محکمې ۶۹ کلن مارک یول او ۵۱ کلن ټیري بروور د ناقانونه کډوالۍ د اسانتیا برابرولو په جرم مجرم وپېژندل.
تر دې وړاندې ۵۲ کلن کارل بېلي هم پر خپلو جرمونو اعتراف کړی و. د قضیې یو بل تورن روهېت چاولا هم د ناقانونه کډوالۍ د اسانتیا برابرولو په جرم مجرم پېژندل شوی.
د جرمونو ملي اداره وايي، مارک یول او کارل بېلي د ۲۰۱۹کال د سپټمبر په ۱۱مه هغه مهال ونیول شول چې د قاچاقي عملیاتو په بدل کې یې د ۶۵زره پونډو نغدې پیسو یوه کڅوړه ترلاسه کړې وه.
