ایران د عمان په خلیج کې د امریکا د سمندري کښتیو په لور خبرداری ورکوونکي توغندي توغولي دي

د ایران پوځ ویلي چې دغه سمندري بېړۍ چې د DDG-103 او DDG-87 په نوم پېژندل کېږي، له دې اقدام وروسته د عمان سمندر پرېښی او د هند سمندر پر لور تللي دي.

د ایران د پوځ د سمندري ځواکونو مرکز ویلي، که اړتیا وي نو له لا اوږد واټن ویشتونکو توغندیو څخه به هم ګټه واخلي.

له بلې خوا، د امریکا سمندري قوماندانۍ ویلي: «موږ به د ناقانونه شبکو د ګډوډولو او د هغو بېړیو د درولو لپاره چې ایران ته مادي ملاتړ برابروي، په ټوله نړۍ کې سمندري اجراتو ته دوام ورکړو، هغه که هر ځای وي.»

دا په داسې حال کې ده چې د ایران شاوخوا د سمندري امنیت په اړه ترینګلتیاوې زیاتې شوې او واشنګټن د ایران ته د تېلو لیږد بندیزونه عملي کوي چې تهران بیا څو ځله د هرمز تنګي او شاوخوا اوبو کې د بېړیو د تګ راتګ د ګواښ خبرداری ورکړی دی.