د افغانستان او هند د کرېکټ ملي لوبډلې سبا په یوې تاریخي ټېسټ لوبه کې سره مخامخ کېږي
د افغانستان او هند د کرېکټ ملي لوبډلو ترمنځ خورا په زړه پورې او یوازنۍ ټېسټ لوبه سبا (شنبه د غبرګولي ۱۶مه) په نوي چندیګړ کې پیلېږي. د افغانستان کرېکټ بورډ اعلان کړی، چې افغان اتلان د دغې تاریخي او پنځه ورځنۍ لوبې لپاره بشپړ چمتووالی لري.
د دغې لوبې لومړی توپ به د افغانستان پر وخت د سهار په اته نیمو بجو وغورځول شي.
د کرېکټ بورډ د معلوماتو له مخې، دغه سیالي د هند په نوي چندیګړ کې د مهاراجا یادویندرا سینګ په نړیوال کرېکټ لوبغالي کې ترسره کېږي. افغان لوبغاړي د پنځو ورځو لپاره د پوره همت، مهارت او هوډ ښودلو په موخه د لوبې ډګر ته ښکته کېږي او د بریا لپاره بشپړ چمتو دي.
د افغانستان کرېکټ بورډ په خپله رسمي پاڼه کې لیکلي، چې د دوی لوبډله د دې لوبې پیل ته پوره چمتووالی لري. د کرېکټ مینه وال د دغې لوبې پیلېدو ته په تمه دي او داسې پتیېل کېږي چې دا لوبه به د دواړو هېوادونو ترمنځ په زړه پورې سیالي نندارې ته وړاندې کړي.
د افغانستان د کرېکټ ملي لوبډله له دې وړاندې هم د نړۍ له پیاوړو لوبډلو سره په بېلابېلو بڼو کې لوبېدلې ده، خو د هند پر وړاندې دغه یوازنۍ ټېسټ لوبه د افغان لوبغاړو د وړتیا او تجربې د ارزونې لپاره یو مهم فرصت بلل کېږي.
