طالبانو د کابل په یوولسمه حوزه کې چاودنه تایید کړه

د جرمني رسنیو د پنجشنبې په ورځ راپور ورکړی چې یاد دواړه افغان کډوال د کډوالو د استوګنې په یوه مرکز کې له یو بل سره شخړه کړې وه. د پولیسو د لومړنیو موندنو له مخې، ۳۶ کلن افغان وګړي د شخړې پر مهال چاقو راایستلی او څو ځله یې پر بل افغان برید کړی دی.

عیني شاهدانو ویلي، چې قرباني د سر او ځیګر برخه کې سخت ټپي شوی و، خو د بیړنیو مرستندویه خدماتو او د ډاکټرانو د هڅو سربېره یې په روغتون کې ساه ورکړه.

پولیسو شکمن کس له هېڅ ډول مقاومت پرته د هغه د استوګنې له کانتینر څخه نیولی دی.

پولیسو ویلې، قاضي د شکمن کس د موقتې توقیف او زندان ته لېږدولو پرېکړه کړې ده.

د جرمي پولیسو او څارنوالۍ د دې پېښې د انګېزې او نورو جزییاتو په اړه جلا څېړنې پیل کړې دي.

د طالبانو د ویاند مرستیال نن جمعې ورځ، د غبرګولي پر ۱۵مه په اېکس کې لیکلي، چې دغو راستنېدونکو کورنیو ته په بېلابېلو سرحدي سیمو کې مالي، روغتیايي او ترانسپورټي خدمات وړاندې شوي دي.

د خپرو شویو شمېرو له مخې، د تورخم له لارې ۴۹۲ کورنۍ چې ۲۷۰۹ تنه کېږي هېواد ته راستنې شوې، چې له دې جملې څخه ۴۷۵ کورنۍ ننګرهار، کونړ، لغمان او کابل ته لېږدول شوې دي.

د طالبانو ادارې د دغو کورنیو د لېږد لپاره له ۲ میلیونه او ۱۷۰ زره څخه ډېرې افغانۍ کرایه ورکړې او له ۵۰۵ کورنیو سره یې مالي مرسته کړې ده.

په دې وروستیو کې د پاکستان او ایران څخه د افغان کډوالو د جبري اېستلو پروسه په چټکۍ سره ادامه لري او دوی د کابل په ګډون په بېلابېلو ولایتو کې مېشت شوي دي.

د طالبانو د بهرنیو چارو وزارت د ستراتېژیکو مطالعاتو مرکز نن جمعه، د غبرګولي پر ۱۵مه په اېکس کې لیکلي، چې په کابل کې د افغانستان او منځنۍ اسیا د هېوادونو د څېړنیزو مرکزونو ترمنځ د تینک ټانکونو د فورم پر جوړېدو خبرې شوې دي.

د طالبانو د بهرنیو چارو وزارت د ستراتېژیکو مطالعاتو مرکز د معلوماتو له مخې، د دغه فورم د جوړېدو په اړه پرېکړه او مفصلې خبرې د ترمذ ډیالوګ د دویمې غونډې په څنډه کې شوې دي.

د ترمذ ډیالوګ دویمه غونډه د غبرګولي په ۱۴مه نېټه ترسره شوه، چې په کې د څه باندې ۴۰ هېوادونو او ۱۰ نړیوالو او سیمه‌ییزو سازمانونو شاوخوا ۲۰۰ استازو ګډون کړی و.

په دې ناسته کې د طالبانو د صنعت او سوداګرۍ وزیر نورالدین عزیزي په انلاین بڼه او د بهرنیو چارو وزارت د ستراتېژیکو مطالعاتو د مرکز په استازولۍ ذاکر جلالي او غنچه ګل ارمان ګډون کړی و.

د ترمذ ډیالوګ په دغه غونډه کې ګډونوالو د بېلابېلو سیمه‌ییزو مسایلو په اړه بحثونه وکړل.

د طالبانو د بهرنیو چارو وزارت د ستراتېژیکو مطالعاتو مرکز ویلي، چې د ترمذ د دویمې ناستې د بحثونو اصلي تمرکز د افغانستان له لارې د منځنۍ او سویلي اسیا ترمنځ پر اقتصادي همکاریو او په ځانګړي ډول پر اقتصادي اتصال او ترانزیټ و.

د طالبانو اداره هڅه کوي چې د دا ډول ناستو له لارې له منځنۍ اسیا سره خپلې سوداګریزې او ډیپلوماټیکې اړیکې پراخې کړي.

دوه ورځې وړاندې پر ټولنیزو رسنیو باندې د ملګرو ملتونو د دفتر د کارکوونکې فرشتې عمادي د وژل کېدو خبرونه خپاره شول.

نن د جمعې په ورځ په کابل کې د ملګرو ملتونو دفتر د مېرمن عمادي د مړینې په اړه پر خپل اېکس‌پاڼه لیکلي:«په افغانستان کې د ملګرو ملتونو استازولي د وګړو صندوق د کورنۍ د ارزښتمنې غړې اغلې فرشتې عمادي پر مړینې ژوره خواشیني څرګندوي. د هغې نشتون به په کلکه احساس شي. موږ د هغې له کورنۍ، خپلوانو او دوستانو سره خپله د زړه له کومې خواخوږي شریکوو».

په کابل کې د ملګرو ملتونو دفتر غوښتنه کړې، چې د مېرمن عمادي د کورنۍ شخصي حریم ته دې درناوی وشي.

طالبانو تر اوسه د فرشتې عمادي د مړینې او یا هم وژل کېدو په اړه څه نه دې ویلي.

د افغانستان د فولادو د صنعت اتحادیې رییس عبدالنصیر ریښتیا ځايي رسنیو ته ویلي، چې د افغانستان او ترکمنستان د اوسپنې فابرېکو ترمنځ د ۱۵۰ زره ټنه ګول سېخ تړون لاسلیک شوی دی او د اتقال پروسه یې هم پیل شوې ده.

نوموړی ویلي، چې تېر کال یې یوازې پاکستان ته ۶۰ زره ټنه ګول سېخ صادر کړی دی.

د اوسپنې د وېلو کولو د فابرېکو ځینو مسوولان ویلي، چې د افغانستان د اوسپنې فابرېکو د تولید کیفیت نړبوال معیارونو سره برابر دي.

په ورته وخت کې د بلخ ولایت د اوسپنې فابرېکو ټولنې مسوولین وايي، چې په دغه ولایت کې ۴ د اوسپنې د وېلو کولو فابرېکې فعالیت لري.

د طالبانو د بلخ ځايي چارواکو د اوسپنې د وېلې کولو یوې فابرېکې پرانیستلو پرمهال ویلي، افغان سوداګر دې د اوسپنې وېلو کولو پرخه خپلې پانګونې زیات کړي. د دوی په وینا، پخوا اوسپنیز کباړ توکي بهرنیو هېوادونو ته صادرېدل، خو اوس ترې په کور دننه بېلابېل فولادي محصولات تولیدېږي.

مسوولین زیاتوي، د فولادو د تولید پراختیا نه یوازې د صنعتي ودې لامل شوې، بلکې د کارموندنې او اقتصادي پرمختګ لپاره یې هم نوي فرصتونه رامنځته کړي دي.