د پاکستان په کراچۍ کې په تېرو ۵ مياشتو کې د ټرافيکي پېښو له امله ۳۲۲ کسان مړه شوي
د پاکستان د مهم اقتصادي ښار کراچۍ د ټرافیک پولیسو ويلي، د ۲۰۲۵ کال پرتله د ۲۰۲۶ کال په لومړیو پنځو میاشتو کې په ټرافیکي پېښو کې د خلکو د مړينې کچه راټيټه شوې، خو بيا هم د یادو پېښو له امله سلګونه کسان مړه شوي دي.
د کراچۍ پوليسو د ارقامو لهمخې، د ۲۰۲۶ کال د جنورۍ له لومړۍ نېټې څخه د مې تر ۳۱مې پورې د ښار په بېلابېلو سیمو کې ۲۹۶ ټرافیکي پېښې ثبت شوې دي، په داسې حال کې چې تېر کال په همدې موده کې دا شمېر ۳۹۱ وو.
د سرچینې په وینا، د روان کال په لومړو پنځو مياشتو کې په بېلابېلو ټرافیکي پېښو کې ۳۲۲ کسان مړه شوي او ۵۰۲ نور ټپيان شوي دي.
په پاکستان کې ډېری ټرافيکي پېښې د سړکونو د خرابوالي، اضافه وزن او د ټرافیکي قوانینو او اصولو د نه مراعاتېدو له امله رامنځته کيږي.
