په ایران کې مېشت ۱۴ افغان لوبغاړي د افغانستان د ۱۷ کلنو فوټسال لوبډلې کمپ ته بلل شوي دي

د یاد فدراسیون په وینا؛ دغه لوبغاړي به د ۱۷ کلنو فوټسال ملي لوبډلې د روزونکي بهروز جعفري تر څار لاندې د هېواد دننه رابلل شویو لوبغاړو سره ګډ تمرینونه وکړي. د فوټبال فدراسیون ویلي، چې له ایران نه رابلل شوي لوبغاړي باید کابل ته سفر وکړي او د غوراوي وروستي پړاو په تمریناتو او تخنیکي ارزونو کې برخه واخلي.

ټاکل شوې ده، چې د کابل د دغه تمریناتي کمپ له پای ته رسېدو وروسته به د افغانستان د ۱۷ کلنو فوټسال ملي لوبډلې وروستی نوملړ اعلان شي؛ څو د ۲۰۲۶کال د ځوانانو نړۍوالو المپیک سیالیو کې ګډون وکړي.

افغانستان د فوټسال په برخه کې د اسیا د اتل او استازي په توګه د ۲۰۲۶کال ځوانانو نړۍوالو المپيک سیالیو ته لار موندلې ده، چې په سینګال کې به ترسره شي. د فوټبال فدراسیون هیله څرګنده کړې، چې د هېواد دننه او بهر د افغان استعدادونو په راټولولو سره به یوه پیاوړې او سیالۍ ته چمتو لوبډله جوړه کړي.