د امریکا د خزانې وزیر: د ایران اقتصاد د پاشل کېدو په حال کې دی
د امریکا د خزانې وزیر سکاټ بېسنټ ویلي، چې د ایران اقتصاد د پاشل کېدو په حال کې دی او د دغه هېواد پوځي وړتیاوې هم په جدي توګه کمزورې شوې دي.
بېسنټ د جمعې په ورځ (د غبرګولي ۱۵مه) په خپله اېکسپاڼه لیکلي، چې د امریکا د خزانې وزارت به د «حماسي غوسې» عملیاتو په چوکاټ کې د ایران د بېړیو شبکې پرې کولو او همداراز پټو بانکي شبکو او نړیوالې سوداګرۍ ته د دغه هېواد د لاسرسي د محدودولو لپاره خپلو اقداماتو ته دوام ورکړي.
هغه ټینګار کړی، چې واشنګټن هڅه کوي د ایران د هغو مالي او لوژستیکي شبکو مخه ونیسي چې د نړیوالو بندیزونو د مخنیوي لپاره ترې کار اخیستل کېږي.
