د جوزجان اوسېدونکی: طالبانو په شبرغان کې د ترکاڼو هټۍ تړلې دي
د جوزجان یوه اوسېدونکي افغانستان انټرنشنل ته په یوې لېږلې ویډیو کې ویلي، چې طالبانو په جوزجان کې د ترکاڼو (نجارانو) هټۍ تړلې دي. نوموړي ویلي، طالبانو خبرداری ورکړی چې دوی دې له ښاره یوې بلې سیمې ته خپلې هټۍ انتقال کړي.
د شبرغان ښار دغه ترکاڼ وايي، چې طالبانو له تېرو دوو ورځو راهیسې په دغه ښار کې د ترکاڼۍ هټۍ تړلې او دوی ته د کار اجازه نه ورکوي. د هغه په وينا؛ طالبانو له ترکاڼانو غوښتنه کړې، چې خپل فعاليتونه له ښاره بهر انتقال کړي؛ خو تراوسه يې د دوی د کار د دوام لپاره کوم ځانګړی ځای نهدی ټاکلی.
نوموړي ویلي، چې د دوی د هټیو د تړلو لامل هم نهدی ورسره شریک شوی. هغه وايي، که څه هم په جوزجان کې یوشمېر ترکاڼانو د طالبانو ښاروالۍ ته مراجعه کړې وه چې دغه موضوع وڅاري؛ خو له نامناسب چلند او سپکاوي سره مخ شوي دي.
