د امریکا یوې فدرالي محکمې د دغه هېواد د کډوالۍ او تابعیت ادارې هغه پرېکړه لغوه کړې، چې له مخې یې د افغانانو او نورو پناه غوښتونکو د دوسیو څېړنه تر نامعلوم وخت پورې ځنډولې وه. افغان اېواک بنسټ دا اقدام د افغان پناه غوښتونکو لپاره یو «بریالی» ګام وباله.
د افغان کډوالو د ملاتړ یاد بنسټ مشر شان ونډیور د جمعې په ورځ (د غبرګولي ۱۵مه) په یوې اعلامیه کې د محکمې دغه پرېکړه د قانون د حاکمیت او د زرګونو هغو افغانانو لپاره یو لوی بریالی ګام وباله چې ټول قانوني پړاوونه یې بشپړ کړي دي.
شان ونډیور وویل، چې په تېرو میاشتو کې ګڼو افغان همکارانو د کاري جوازونو د پای ته رسېدو، د تابعیت د مراسمو د لغوه کېدو او د دایمي استوګنې یا ګرین کارت د دوسیو د ځنډېدو له امله له سختو ستونزو او بې برخلیکۍ سره مخ وو.
هغه زیاته کړه، چې په همدې اونۍ کې یې په ډالاس او فورټ ورت ښارونو کې له داسې کورنیو سره لیدلي چې د کاري جوازونو د نه تمدیدېدو له امله یې د دندو د له لاسه ورکولو وېره درلوده او د بې برخلیکۍ له امله یې خپلې زده کړې او سفرونه ځنډولي وو.
د افغان اېواک مشر د محکمې له دې پرېکړې مننه وکړه چې د دغو کورنیو ستونزې یې درک کړي او ثابته یې کړه، چې دولتي ادارې باید د قانون په چوکاټ کې کار وکړي. د هغه په وینا، هېڅوک باید یوازې د خپل زیږون د ځای له امله له عادلانه چلند او د دوسیو له څېړلو بې برخې نهشي.
له بلې خوا، ونډیور د امریکا پر کانګرس نیوکه وکړه، چې د افغان همکارانو او د هغوی د کورنیو د برخلیک په اړه یې د مدافعینو، تجربه کارو سرتېرو او حقوقي بنسټونو له پرله پسې خبرداریو سره سره جدي ګامونه نهدي پورته کړي. هغه وویل، چې په دغو کسانو کې داسې سرتېري او همکاران شته چې د امریکایي ځواکونو تر څنګ یې خپل ژوند په خطر کې اچولی وو او اوس باید په اداري بندیز کې پاتې نهشي.
