د افغانستان د کرېکټ الف لوبډله په درې اړخیزه لوبلړۍ کې د ګډون په موخه سریلانکا ته لاړه
د افغانستان کرېکټ بورډ وايي، د کرېکټ الف لوبډله د هند او سریلانکا د الف لوبډلو پر وړاندې په ۳ اړخیزه لوبلړۍ کې د ګډون په موخه نن سهار د سریلانکا پر لوري روانه شوه. افغان لوبډله به د یادو سیالیو په ترڅ کې د راتلونکې پنجشنبې په ورځ خپله لومړۍ لوبه د هند پر وړاندې ترسره کړي.
د افغانستان د کرېکټ بورډ په وینا، دغه سیالۍ به د سریلانکا په ډمبولا ښار کې ترسره شي او په ډلهییز پړاو کې درې ګډونوالې لوبډلې به دوه ځله له یو بل سره سیالۍ وکړي او د یادې لوبلړۍ په پای کې د جدول دوه غوره لوبډلې به پایلوبې ته لاړې شي.
د افغانستان د کرېکټ الف لوبډلې لوبډلمشري د عمران میر پر غاړه ده.
دا په داسې حال کې ده، چې د افغانستان د کرېکټ ملي لوبډلې هم نن د هند پر وړاندې یوازنۍ ټېسټ لوبه پیل کړه.
