اروپايي ټولنه په داسې حال کې بروکسل ته د طالبانو د یوه پلاوي د ورتګ او خبرو اترو چمتووالی نیسي چې تر دې وړاندې یې د ښځو او نجونو پر حقونو د طالبانو محدودیتونه غندلي وو او خبرداری یې ورکړی و چې دغه کړنې ښايي د جنسیت پر بنسټ ځورونې تر کچې ورسېږي.
د اروپايي کمېسیون په وینا، ټاکل شوې خبرې اترې به په تخنیکي کچه ترسره شي او تمرکز به یې د هغو افغان وګړو پر بېرته ستنولو وي چې اروپايي هېوادونه یې امنیتي ګواښ یا په جرمونو کې ښکېل کسان بولي. اروپايي چارواکي وایي، په دغو غونډو کې به لوړپوړي سیاسي استازي ګډون ونه کړي، ځکه اروپايي ټولنه نه غواړي د طالبانو واکمنۍ ته د مشروعیت ورکولو تاثر رامنځته شي.
دا لیدنه په داسې وخت کې کېږي چې په افغانستان کې نجونې لا هم له شپږم ټولګي پورته له رسمي زده کړو بېبرخې دي. اروپايي ټولنې په ۲۰۲۳ کال کې د طالبانو د پوهنې پر وزیر حبیب الله اغا بندیزونه لګولي وو، ځکه د نجونو د زده کړو د بندیز پالیسي یې عملي کړې وه.
د پټو زدهکړیزو مرکزونو د شبکې همغږي کوونکی احمد منصور رمېزي وایي، له ۲۰۲۱ کال راهیسې یې د هغو نجونو لپاره پټ ټولګي جوړ کړي چې له رسمي زده کړو محرومې شوې دي. د هغه په وینا، اوس مهال په اتو ولایتونو کې شاوخوا ۳۰ پټ مرکزونه فعال دي او یوازې سږ کال یې نږدې دوه زره نجونې جذب کړې دي.
رمېزي وایي، په دغو مرکزونو کې نجونو ته لیک لوست، ریاضي، کمپیوټري زده کړې او نور بنسټیز مضامین ورښودل کېږي. نوموړی زیاتوي چې ټول فعالیتونه په پټه ترسره کېږي، څو د طالبانو له څار څخه خوندي پاتې شي.
بلخوا، د اروپا پارلمان غړې هانا نویمان د طالبانو د پلاوي پر بلنه نیوکه کړې او ویلي یې دي چې میلیونونه افغان نجونې لا هم له زده کړو بېبرخې دي، خو د طالبانو استازي اروپا ته د سفر فرصت ترلاسه کوي. د هغې په وینا، که اروپايي ټولنه د خپلو بنسټیزو ارزښتونو پر ځای سیاسي او اداري ګټې لومړیتوب وګرځوي، نو خپل اعتبار به زیانمن کړي او نورو استبدادي حکومتونو ته به هم ناسم پیغام ولېږي.
د بشري حقونو فعالان ټینګار کوي چې له طالبانو سره هر ډول اړیکې باید د افغان ښځو او نجونو د حقونو له موضوع جلا ونه ګڼل شي او نړیوال فشارونه باید دوام ومومي.
