په بدخشان کې د اتو لوبډلو په ګډون د وزلوبې د دښت شیوه د څلورم پړاو سیالۍ پیل شوې. د طالبانو تر کنټرول لاندې د المپیک، بدني روزنې او سپورټ ریاست په یوې خبرپاڼه کې ویلي، چې دغه سیالۍ د وزلوبې، نیزې وهلو او دودیزو لوبو د ملي فدراسیون په کوربتوب پیل شوې دي.
د طالبانو د المپیک، بدني روزنې او سپورټ ریاست د شنبې په ورځ (د غبرګولي ۱۶مه) د یوې خبرپاڼې په خپرولو سره ویلي، په دغو سیالیو کې د بدخشان له مرکز او ولسوالیو څخه اته ګډونوالې لوبډلې په دوو ګروپونو کې تنظیم شوې دي.
دغه لوبې به د دښت شیوه په سیمه کې د پنځو ورځو لپاره دوام وکړي، چې په ترڅ کې به یې بېلابېلې لوبډلې له یو بل سره سیالۍ وکړي.
د دغه تورنمنټ په لومړۍ لوبه کې د شاهین یفتل لوبډله د عقابان بهارستان د لوبډلې پر وړاندې میدان ته ووته. په دغې لوبه کې د شاهین یفتل لوبډلې وکولای شول چې د عقابان بهارستان لوبډلې ته یو د ۳ پر وړاندې پایلې سره ماتې ورکړي او د دغو سیالیو لومړۍ بریا په خپل نوم کړي.
د بدخشان د بدني روزنې او سپورټ ریاست بیا وایي، چې د دغو دودیزو لوبو له ترسره کولو موخه په سیمه کې د وزلوبې وده او د ځوانانو ترمنځ د همغږۍ رامنځته کول دي.
