خیبر کې ځایي اوسېدونکو د ناامنۍ پر ضد د احتجاج په توګه ښوونځي تړي

د جرګې ګډونوالو پرېکړه کړې چې تر هغه وخته به ټول شخصي او دولتي ښوونځي تړلي وي، ترڅو په سیمه کې امن او ډاډمنه فضا بېرته نه وي ټینګه شوې.
د جرګې له پرېکړو سره سم، د پولیو واکسین د روان او راتلونکو پړاوونو په بهیر کې به ولس ګډون نه کوي. همداراز ویل شوي چې په قومي جرګو او ولسي غونډو کې به پولیس په رسمي یونيفام کې ګډون نه کوي.
جرګې پر موټرسایکلونو بشپړ بندیز هم لګولی او اعلان یې کړی چې د کرنې، ځنګلونو او نورو دولتي ادارو کارکوونکي به خپلې دندې نه ترسره کوي.
د جرګې ګډونوالو زیاته کړې چې پر سړکونو به احتجاجي ناستې او ولسي اعتراضونه دوام ولري.
د سیمې مشرانو ټینګار کړی چې یادې پرېکړې به تر هغه وخته نافذې وي، څو پورې په سیمه کې امن او نظم بېرته نه وي ټینګ شوی او د خلکو د امنیت لپاره عملي ګامونه نه وي پورته شوي.