زیلنسکي: د اوکراین بېپیلوټه الوتکو د روسیې سمندري او د تېلو تاسیسات په نښه کړي
د اوکراین ولسمشر ولادیمیر زیلنسکي وایي، د اوکراین ځواکونو د روسیې پر ضد د خپلو وروستیو بریدونو په ترڅ کې د سنټ پیټرزبورګ په سیمه کې د روسیې د سمندري ځواکونو وسلو زېرمې او د کرونشتات پوځي اډه، او همداراز د کراسنودار په سیمه کې د تېلو یوه زېرمه په نښه کړې ده.
زیلنسکي په خپل ایکسپاڼه کې لیکلي چې د اوکراین بېپیلوټه الوتکو تېره شپه شاوخوا زر کیلومتره واټن وهلی او د سنټ پیټرزبورګ سیمې ته رسېدلې دي. د هغه په وینا، دغه بریدونه د روسیې د سمندري ځواکونو پر مهمو پوځي تاسیساتو ترسره شوي دي.
نوموړي زیاته کړې چې د اوکراین د لرې واټن بریدونو په ترڅ کې د کراسنودار سیمې دننه شاوخوا ۵۰۰ کیلومتره واټن کې د تېلو یوه زېرمه هم په نښه شوې ده.
د اوکراین ولسمشر دغه بریدونه د اوکراین د وسلهوالو ځواکونو، د امنیتي خدماتو او د دفاعي استخباراتو د ګډو عملیاتو پایله بللې او ویلي یې دي چې «دا مهمې لاسته راوړنې دي.»
زیلنسکي پر روسیې غږ کړی چې جګړه پای ته ورسوي او پر ملکي وګړو او ژوند د بریدونو درولو ته غاړه کېږدي. هغه ویلي: «روسیه باید خپله جګړه پای ته ورسوي او پر ژوند بریدونه ودروي. د اوکراین پر وړاندې د هر ډول ظلم او تېري ځواب به عادلانه وي.»
د اوکراین او روسیې ترمنځ جګړه له درېیو کلونو څخه زیاته موده وړاندې پیل شوې او دواړه لوري لا هم پر یو بل د لرې واټن بریدونو او پوځي عملیاتو ته دوام ورکوي.
