د طالبانو کورنیو چارو وزارت وایي چې د نشهیي توکو پر وړاندې د مبارزې ځواکونو یې د هېواد په بېلابېلو ولایتونو کې د ځانګړو عملیاتو پر مهال ۶۸ کسان د نشهیي توکو د قاچاق او پلور په تړاو نیولي دي.
د یاد وزارت په خبرپاڼه کې چې شنبه(د غبرګولي۱۶مه) خپره شوې راغلي چې دغه کسان په ننګرهار، جوزجان، بلخ، کندهار، لغمان، غزني، پکتیا، پروان، کاپیسا او سمنګان ولایتونو کې نیول شوي دي.
د کورنیو چارو وزارت زیاتوي چې له نیول شویو کسانو څخه نږدې ۲۰۰۰ دانې نشهیي ګولۍ، او همداراز یو اندازه تریاک، شیشه او چرس هم ترلاسه شوي دي.
د خبر له مخې، له لومړنیو څېړنو وروسته به د دغو کسانو دوسیې عدلي او قضایي ارګانونو ته وسپارل شي.
