د طالبانو د مالیې وزارت د میوو شیرې تعرفه له ۶۰ سلنې ۲۰ سلنې ته راښکته کړې ده. دغه وزارت د یادې پرېکړې موخه د پانګونو جلب او د کورنیو میوو پروسس او بازار موندنه بللې ده. دغه پرېکړه به د روان کال په چنګاښ میاشت کې عملي شي.
د طالبان مالیې وزارت د یکشنبې په ورځ (د غبرګولي ۱۷مه) د یوې خبرتیا په خپرولو سره د میوو د شیرې د تعرفې له راکمولو خبر ورکړ.
دغه وزارت ویلي، د کرنې، اوبو لګولو او مالدارۍ وزارت په مشرۍ د مالیې او صنعت او سوداګرۍ وزارتونو او د سوداګرۍ او صنایعو د درې ګونو خونو په غړیتوب د تعرفې کمېټې پرېکړه کړې، چې د میوو شیرې یا کانسټرېټ دې کارخونو ته په حمایوي تعرفه کې نه ورکول کېږي، بلکې تعرفې دې له ۶۰ سلنې څخه ۲۰ سلنې ته راټيټه شي.
د یاد وزارت په خبرتیا کې راغلي: «دغه پرېکړه به د روان ۱۴۰۵ کال د چنګاښ میاشتې له ۴ نېټې وروسته پلې شي».
دغه وزارت د یادې پرېکړې موخه د پانګونو جلب او د کورنیو میووپروسس او ورته بازار موندنه بللې ده.
د مېوې شیره هغه غلیظه مایع ده، چې د میوو له عصارې څخه په ځانګړو تخنیکي وسایلو سره د اوبو د یوې برخې په ایستلو جوړیږي او بیا په جوسونو، مشروباتو او نورو خوږو خوراکي توکو کې د یوه پروسس له لارې استفاده کېږي.
