د موساد پخوانی لوړپوړی چارواکی: د اسراییل طرحه لا هم کولای شي د ایران نظام رانسکور کړي
د اسراییل د استخباراتي ادارې یا موساد یوه پخواني لوړپوړي چارواکي ویلي: «هغه نقشه چې د اسراییل او موساد له لوري چمتو شوې، لا هم کولای شي د اسلامي جمهوریت د رانسکورېدو لامل شي، خو د جګړې د درولو په اړه د امریکا له پرېکړې وروسته، دا نقشه په خپلو ټولو پړاوونو کې تعقیب نشوه».
د اسراییل دغه پخواني لوړپوړي استخباراتي چارواکي چې په مستعار نوم «الف» یاد شوی، د اسراییل له ۱۲ ټلوېزیوني شبکې سره په مرکه کې دې ته په اشارې سره چې دا طرحه څو پړاوونه لري، هیله څرګنده کړه چې په راتلونکي کې د دې عملیاتي طرحې نور پړاوونه هم تصویب شي.
هغه پر دې ټکي په ټینګار سره چې داسې شرایط رامنځته شوي چې په پایله کې به یې اسلامي جمهوریت خپل ځواک له لاسه ورکړي، وویل: «زه نشم کولای دا وړاندوینه وکړم، چې د ایران رژیم به په شپږو میاشتو کې نسکور شي که په درېیو کلونو کې، خو بالاخره دا چاره پېښېږي».
