پاکستاني پوځ د شمالي وزیرستان په ميرانشاه کې د ۲۷ وسلهوالو د وژلو ادعا کړې
پاکستاني پوځ ادعا کړې، چې د خیبر پښتونخوا د شمالي وزیرستان په مرکز میرانشا یې د عملیاتو پر مهال ۲۷ وسله وال وژلي دي. د پوځ د عامه اړیکو له دفتر څخه په خپره شوې خبرپاڼه کې راغلي، چې یاد عملیات یې په تېرو ۷۲ ساعتونو کې ترسره کړي دي.
د خبرپاڼې له مخې، «له وژل شویو وسله والو څخه وسلې او مهمات هم ترلاسه شوي دي».
دوی زیاته کړې، «د وسله والو پر وژنې سره د ملک سیف الله داوړ د هدفي وژنې د ناوړه عمل غچ واخیستل شو او عاملین یې د عدالت منګولو ته وسپارل شول».
د یادونې وړ ده، چې د می پر لومړۍ نېټه د شمالي وزيرستان په ميرانشا کې د وسله والو سره په نښته کې د داوړ قوم يو مشر ملک سېف الله خان وژل شوی و.
پوځ ويلي، په دغو سیمو کې د پټو شویو وسله والو د له منځه وړلو لپاره د تصفیې عملیات دوام لري.
د پاکستان پوځ وخت په وخت د دغه ډول عملياتو او پکې د وسله والو د وژلو ادعاوې کوي، خو له ازادو سرچينو څخه ددغو عملياتو او په کې د وژل شوو د پېژنګلو تاييد نه کیږي.
