د سنپټرزبورګ ورزشي غونډه کې د ورزش پر نه سیاسي کېدو ټینګار شوی
د روسیې په سنپټرزبورګ ښار کې د نړیوالې اقتصادي غونډې په ترڅ کې د ورزش او المپیکي همکاریو په اړه جوړه شوې ناسته کې د ورزش پر نه سیاسي کېدو او د ټولو لوبغاړو لپاره د برابر ګډون پر حق ټینګار شوی.
په دې غونډه کې د طالبانو د المپیک، بدني روزنې او ورزش ریس احمدالله وثیق، د روسیې د ورزش وزیر میخایل دیګتیاریوف او د یو شمېر نورو هېوادونو د ورزش وزیرانو او ورزشي چارواکو ګډون کړی و.
ګډونوالو ویلي چې ورزش باید له سیاسي مسایلو لرې وساتل شي او د المپیک نړیواله کمېټه باید د بېلابېلو هېوادونو شرایطو ته په پام سره د نړیوالو او المپیکي سیالیو لپاره د ټولو ورزشکارانو د ګډون زمینه برابره کړي.
په دغه غونډه کې د المپیکي بهیر پر وړاندې د شته ننګونو، د نړیوالو ورزشي همکاریو د پراختیا او د هېوادونو ترمنځ د اړیکو د پیاوړتیا پر لارو چارو هم بحث او خبرې شوي.
