مینا خان افريدي: د پېښور عالي محکمې د حکم باوجود مې جرمني ته د سفر مخه نیول شوې
د خیبر پښتونخوا د لوړو زدهکړو وزیر مینا خان افريدي ادعا کړې چې د پېښور عالي محکمې د حکم باوجود ورته د هوايي ډګر له لارې د بهر سفر اجازه نه ده ورکړل شوې او هغه د جرمني له تګ څخه راګرځول شوی.
نوموړي په ایکس پاڼه کې لیکلي چې هغه د جرمني د یوې لوړې تعلیمي ادارې «د ټوبینګن پوهنتون» په رسمي بلنه د سفر اراده لرله، چې د خیبر پښتونخوا د پوهنتونونو او زدهکړو په برخه کې د ګډو همکاریو د یو شمېر مهمو پرمختګونو د نهايي کولو لپاره پلان شوی و.
هغه ویلي، چې د یادو پرمختګونو له مخې د خیبر پښتونخوا د پوهنتونونو او محصلینو لپاره ګڼې پروژې او همکارۍ تر بحث لاندې وې، چې غوښتل یې د سفر په ترڅ کې یې وروستۍ بڼه ورکړي.
مینا خان افريدي په خپل پیغام کې د دې اقدام په اړه خواشیني څرګنده کړې او ویلي یې دي چې د هغه په وینا د پېښور عالي محکمې د حکم نه عملي کېدل «اندېښمنوونکي» دي او دا کار د خیبر پښتونخوا له ځوانانو سره جفا ده.
نوموړي زیاته کړې چې د داسې محدودیتونو له امله د ایالت د زدهکړو او د نړیوالو علمي همکاریو فرصتونه زیانمنېږي.
تر اوسه پورې د پاکستان فدرالي حکومت یا اړوندو ادارو د مینا خان افريدي د دغو څرګندونو او د سفر د مخنیوي په اړه رسمي غبرګون نه دی ښودلی.
