په نوي ډیلي کې د پاکستان سفارت هندي زیارت کوونکو ته ۷۳۷ ویزې صادرې کړې
په نوي ډیلي کې د پاکستان عالي کمېشنرۍ وايي، چې هندي زیارت کوونکو ته یې په دغه هېواد کې د ګورو ارجن دیو جي د مړینې ورځې په کلنۍ مېله کې د ګډون لپاره ۷۳۷ ویزې صادرې کړې دي. دغه مذهبي مراسم د ۲۰۲۶ کال د جون له ۱۰مې نېټې څخه تر ۱۹مې نېټې پورې په پاکستان کې ترسره کېږي.
د ترلاسه شویو معلوماتو له مخې، دغه ویزې د سېک مذهب پیروانو ته ورکړل شوې دي څو وکولای شي په پاکستان کې د خپل مذهبي مشر د مړینې په مناسبت په جوړېدونکو مراسمو کې برخه واخلي.
د پاکستان سفارت د دغو ویزو د صادرولو موخه د مذهبي ګرځندوی او د دواړو هېوادونو ترمنځ د ولسي اړیکو اسانتیا بللې ده.
د پاکستان عالي کمېشنرۍ ویلي چې دوی د مذهبي ځایونو د لیدنې لپاره د اسانتیاوو برابرولو ته ژمن دي او هر کال سلګونه هندي سک زیارت کوونکي د خپلو مقدسو ځایونو د لیدو لپاره پاکستان ته سفر کوي.
د دغو مراسمو لپاره په پاکستان کې ځانګړي امنیتي او ټرانسپورټي ترتیبات هم نیول شوي دي.
