طالبانو په ازبکستان کې د رزمي ورزشونو افغان مډال ګټونکي وستایل
د طالبانو د المپيک، بدني روزنې او ورزش رياست د ازبکستان په کوربه توب د رزمي ورزشونو اسيايي سياليو ته د لارموندنې څلورم پړاو او نويو ځوانانو اسيايي سياليو کې مډال ګټونکي لوبغاړي د يوې ځانګړې غونډې په ترڅ کې د ډاليو په ورکړې سره وستایل.
د طالبانو د المپيک، بدني روزنې او ورزش رياست د یکشنبې په ورځ (د غبرګولي ۱۷مه) د یوې خبرپاڼې په خپرولو سره ویلي، د رزمي ورزشونو اسيايي سياليو ته د لارموندنې څلورم پړاو کې ۱۳ افغان لوبغاړو، څلورو روزونکو او يوه پلاوي ګډون کړی وو، چې له ډلې يې سمیعالله حميدي د سپينو زرو مډال، نصرت جلالي، واصل مردان، احمد رضا ايماق او پرويز کاپيساوال د ژېړو مډالونه ترلاسه کړل.
د خبرپاڼې لهمخې، د نويو ځوانانو اسيايي سياليو کې بیا پنځو لوبغاړو، يوه روزونکي او يوه پلاوي ګډون کړی وو، چې روحيد ستانکزي پهکې د سپينو زرو مډال او محمد قاسمي د ژېړو مډال ګټونکی شول.
د یادونې وړ ده، چې په ټوله کې له يادو سياليو څخه افغان لوبغاړو ۲ د سپينو زرو او ۵ د ژېړو مډالونه ترلاسه کړي دي.
