د هرات اوسېدونکي: د طالبانو له‌خوا د ښځو نیولو لړۍ هرات ښار له وېرې او اندېښنې سره مخ کړی

یو بل هرات مېشتي ویلي، طالبانو د هرات حوزوي روغتون یوه روغتیاپاله د یادې ډلې د خوښې حجاب د نه مراعتولو په تور د هغې د مېړه په وړاندې نیولې ده. د راپورونو له مخې؛ د هرات ښار په بېلابېلو برخو کې د ښځو د نیولو د پېښو له زیاتېدو سره د دغه ولایت د اوسېدونکو اندېښنې او وېره هم زیاته شوې ده.
د هرات یوه اوسېدونکي ویلي، چې د ښځو او نجونو د نیولو لړۍ له پراخېدو سره «پر ښار د وېرې او اندېښنې فضا خپره شوې ده». د هرات بل اوسېدونکي بیا ویلي: «ښځې او نجونې نور دا جرات نه‌لري، چې کوڅو او بازارونو ته ووځي؛ ځکه د نیولو وېره لري او بیا به یې د اوږدې مودې لپاره د برخلیک په اړه معلومات نه‌وي».

هغه له خلکو غوښتي، چې د افغان ښځو او نجونو د حقونو د دفاع لپاره سره یو شي. د هرات یو بل اوسېدونکي هم ویلي، کله چې له خپلې خور سره بازار ته روان و سره له دې چې خور یې بشپړ حجاب لاره؛ خو د طالبانو د امر بالمعروف مامورانو ورسره ناسم چلند کړی دی.

د راپور له مخې؛ طالبانو په وروستیو میاشتو کې په بېلابېلو ولایتونو او په ځانګړي ډول هرات کې ګڼې ښځې او نجونې د هغه څه له امله نیولې، چې دوی یې «د حجاب نه مراعتول» بولي. همدارنګه د طالبانو د امر بالمعروف د مامورانو له‌خوا د ښځو او نجونو سره د تاوتریخوالي ډک چلند راپورونه هم خپاره شوي دي. طالبانو لاتراوسه د دغه نیونو په اړه څه نه‌دي ویلي.