ریچارډ بېنېټ په هرات کې د ښځو د خپلسرو نیونو د سملاسي درولو غوښتنه کړې

د بریتانیا استازي وویل، چې هېواد یې په افغانستان کې د ښځو او لږکیو د حقونو د پرله‌پسې محدودېدو او زوال په اړه اندېښنه لري.هغه زیاته کړه چې بریتانیا دا تبعیضي بولي او د ده په وینا، «منځنیو پېړیو ته ورته» اقدامات په کلکه غندي.

د بریتانیا استازي همداراز یادونه وکړه چې هېواد یې په وروستیو کلونو کې له افغانستان سره۲۰۰ میلیونه ډالره مرسته کړې ده.

بریتانیا یو ځل بیا له طالبانو وغوښتل چې خپلو ژمنو ته ژمن پاتې شي او عملي یې کړي.

د روسیې استازې وویل، چې د روسیې د سیاست کلیدي ټکو تغییر نه دی کړی او له طالبانو سره په اعتماد ولاړ تعامل په کار دی او دا باید له ضرب الاجل او فشار پرته وي.

نوموړې وویل، چې د سیمې ټول هېوادونه او د مسکو فرمټ دې مسالې ته متعهد دي.

هغې وویل، « هر ډول هڅې چې انتخابي عمل وشي، یا مرستې مشروطې شي، دا د افغانستان ستونزو حل لا غځوي.»

هغې دغه راز وویل، چې د یوناما لپاره باید یو مسوول وټاکل شي، د طالبانو نظریات باید واورېدل شي او د هغوی رضایت هم باید پکې وي.

د روسیې د استازې په وینا، افغانستان د ځان‌بسیاینې او ثبات ته د رسېدو لپاره وخت، هڅو او د نړیوالې ټولنې غیرسیاسي ملاتړ ته اړتیا لري.

نوموړې زیاته کړه، چې که څه هم بندیزونه لا هم پر خپل ځای پاتې دي، خو د بیارغونې بهیر او د ستونزو د حل هڅې هم روانې دي. د نوموړي په وینا، د افغانانو ملاتړ باید د سیاسي ملاحظاتو قرباني نه شي.

د امنیت شورا په نننۍ غونډه کې د فرانسې استازي وویل چې طالبان د نړیوالې ټولنې او افغانانو د پرله‌پسې غوښتنو سره سره، د ښځو پر وړاندې د محدودیتونو پالیسي ته دوام ورکوي او دا کړنې د “سیستماتیکې ځورونې” بڼه لري.

هغه زیاته کړه چې د طالبانو له لوري ښځو ته د زده‌کړې، کار، روغتیايي خدماتو ته لاسرسي او حتی په عامه فضا کې د خبرو حق نه ورکول د جنسیتي ځورونې معادل دي، چې دغه وضعیت د افغانستان اقتصادي وده هم ټکنۍ کړې ده.

د فرانسې استازي وویل چې دغه سیاستونه د تاوتریخوالي د زیاتېدو، د سیمې د بې‌ثباتۍ او د بشري وضعیت د لا خرابېدو سبب شوي دي.

هغه ټینګار وکړ چې فرانسه د افغانانو ملاتړ ته ژمنه ده او له اروپايي شریکانو سره په ګډه د بشري مرستو د دوام هڅه کوي، خو دا مرستې باید د “ښځو له لارې د ښځو لپاره” اصل ته په پام سره ترسره شي.

د هغه په وینا، طالبان باید بشري مرستو ته بشپړه اجازه ورکړي او د مرستو عادلانه وېش یقیني کړي، تر څو مېرمنو او ماشومانو ته مرستې ورسیږي.

فرانسې همدارنګه په افغانستان کې د ترهګرو ډلو لکه داعش خراسان، القاعده او ټي‌ټي‌پي شتون د نړیوالې امنیت لپاره جدي ګواښ وباله او له طالبانو یې وغوښتل چې د دغو ډلو په اړه خپل دریځ روښانه کړي او د هغوی پر ضد عملي اقدامات وکړي.

استازي وویل چې په دې شرایطو کې د ملګرو ملتونو د مرستندوی ماموریت یوناما شتون لا هم اړین دی او فرانسه د دې ماموریت د غځولو ملاتړ کوي.

هغه زیاته کړه چې د دوحې بهیر تر اوسه هیڅ د پام وړ پرمختګ نه دی کړی او طالبان د امنیت شورا د پرېکړه‌لیکونو په عملي کولو کې پاتې راغلي دي.

د فرانسې استازي ټینګار وکړ چې د طالبانو له نړیوالو مکلفیتونو سره سم عمل د هر ډول سیاسي پرمختګ شرط دی او که دا شرایط پوره نه شي، د افغانستان د نړیوال ادغام لپاره هېڅ امکان نه شته.

د بشري مرستو د همغږۍ لپاره د ملګرو ملتونو استازې ایډم ورسن وايي، چې په افغانستان کې بشري وضعیت د ناامنۍ، اقتصادي کمزورۍ، اقلیمي بدلونونو، پراخو بې‌ځایه کېدو او پر ښځو او نجونو د محدودیتونو له امله لا پسې خراب شوی دی.

هغې زیاته کړه، چې د ۲۰۲۶ کال د فېبرورۍ په وروستیو کې د افغانستان او پاکستان ترمنځ د نښتو له امله تر ۱۰۰ زرو ډېر کسان بې‌ځایه شوي او سلګونه ملکي وګړو ته مرګ‌ژوبله اوښتې ده.

د هغې په وینا، په نورستان کې شاوخوا ۱۷ زره کورنۍ چې د خوړو د سخت بحران په نوملړ کې وې، نږدې دوه میاشتې له مرستو بې‌برخې پاتې شوې. همدارنګه د روغتیايي مرکزونو او ښوونځیو زیان د لسګونو زرو کسانو خدمتونه اغېزمن کړي دي.

اوچا خبرداری ورکړ چې د افغانستان په کچه لوږه په چټکۍ سره مخ په زیاتېدو ده، او اوس ۴.۷ میلیونه کسان د خوړو له سخت کمښت سره مخ دي، چې دا شمېر د تېر کال په پرتله ۵۰ سلنه زیاتوالی ښيي. همدارنګه ۳.۷ میلیونه ماشومان د شدیدې خوارځواکۍ له ګواښ سره مخ دي.

استازې وویل چې سږ کال تر اوسه له ۷۳۶ زرو ډېر افغانان، په ځانګړي ډول له پاکستان څخه، بېرته هېواد ته ستانه شوي چې دغه وضعیت پر ښارونو او کوربه ټولنو فشار زیات کړی دی.

د اوچا استازې ټینګار وکړ چې په افغانستان کې ښځې تر ټولو زیاتې اغېزمنې شوې دي او د ښځینه سرپرستانو کورنۍ له سختې لوږې او اقتصادي ستونزو سره مخ دي.

هغې د ښځو پر وړاندې محدودیتونو ته په اشارې وویل چې ښځینه مرستندویانې له جدي خنډونو سره مخ دي، په هرات کې د ښځو د کار ځینې ساحې تړل شوې او د ملګرو ملتونو په دفترونو کې د ښځو پر کار بندیز دوام لري.

د یادونې وړ ده، چې د افغانستان په اړه د ملګرو ملتونو د امنیت شورا غونډه په نیویارک کې روانه ده.

میترا په خپلو خبرو کې وویل، چې افغان ښځې او مدني ټولنه باید د افغانستان د راتلونکي په تړاو په ټولو بهیرونو کې شامل وي او د ښځو د حقونو ملاتړ وشي او افغان کډوال دې بېرته د طالبانو تر واک لاندې افغانستان ته نه استول کیږي.

نوموړې وویل، چې مرستې دې له خلکو سره ډېرې شي، چې د خلکو اړتیاوې پوره شي، خو دا دې د طالبانو په شرایطو او غوښتنو پورې نه تړل کیږي.

نوموړې وویل، چې څومره د طالبانو واک غځیږي، زیان به یې د افغان ښځو لپاره لا ډېر وي.