د هرات یوه اوسېدونکې: طالبانو له هرې نیول شوې مېرمنې د ۱۳زره افغانیو د ورکړې غوښتنه کړې
د هرات یوې اوسېدونکې د دوشنبې په ورځ افغانستان انټرنشنل ته ویلي، چې طالبان په دغه ولایت کې د «بېحجابۍ» په تور د نیول شویو ښځو د خلاصون په بدل کې له هرې کورنۍ ۱۳زره افغانۍ غواړي.
هغه وایي، طالبان له کورنيو غواړي چې د یادې سیمې وکیل حاضر شي او د نیول شويو کسانو ضمانت ورکړي. د هغې په وینا؛ د طالبانو لهخوا د ښځو د نیولو لړۍ د پیسو راټولولو په یوه وسیله بدله شوې ده. نوموړې وایي، طالبان ان هغه ښځې نیسي او سپکوي چې حجاب یې مراعت کړی وي.
هغه چې په یوې کلینیک کې ډاکټره ده وایي: «تېره ورځ کله چې کلینیک ته په لاره وم، د ښار په یوې څنده کې مې د طالبانو د امر بالمعروف وزارت محسبین ولیدل، چې ښځې یې په ټوپکونو وهلې او په زور یې موټر ته پورته کولې او محبس ته یې لېږدولې».
نوموړې په یوه لېږلي غږیز پیغام کې په ژړغوني غږ ویلي: « ترکله به دغه وضعیت زغمو. موږ نور ډېر ستړي شوي یو». هغې زیاته کړې، چې د طالبانو لهخوا د ګواښونو له امله ان خپل غږ نهشي اوچتولی.
