بلوچستان کې په بېلابېلو پېښو کې ۶ کسان وژل شوي او ۲۴ نور ټپیان دي
د پاکستان د بلوچستان ایالت په بېلابېلو سیمو کې د تاوتریخوالي او ډزو په جلا، جلا پېښو کې لږترلږه شپږ کسان وژل شوي او ۲۴ نور ټپیان دي. له دې ډلې یوازې د خضدار ولسوالۍ د نال او ګریشه په سیمو کې د وسلهوالو په بریدونه کې د یوې ښځې په ګډون دوه کسان وژل شوي او ۱۸ نور ټپیان دي.
د راپورونو له مخې؛ د خضدار ولسوالۍ د نال او ګریشه په سیمو کې شاوخوا ۶۰ وسلهوالو پر پولیسو تاڼې او یوشمېر دولتي او شخصي ودانیو بریدونه کړي، چې له امله یې د یوې ښځې په ګډون دوه کسان وژل شوي او ۱۸ نور ټپیان دي. یادو بریدونو خلکو ته مالي زیانونه هم اړولي دي.
بلخوا د مستونګ ولسوالۍ په درینګړ سیمې کې ناپېژاندو وسلهوالو یو کس په ډزو وژلی دی.
همدارنګه د نصیراباد ولسوالۍ په مرکز ډېره مراد جمالي ښار کې هم یو کس د ډزو په پېښه کې وژل شوی دی.
د عبدالله کلا ولسوالۍ په ځنګل پیرعليزي سیمه کې ناپېژاندو وسلهوالو بیا د عوامي نېشنل ګوند ځايي مشر دولت خان پیرعلیزی په ډزو وژلی او دوه نور یې ټپیان کړي دي. په دُکۍ ولسوالۍ د لوڼي په سیمه کې هم وسلهوالو یو کس په ډزو وژلی دی. پولیس وایي، وژل شوي کس د ځمکې پر سر شخړه لرله.
په ورته وخت کې د چاغي ولسوالۍ په مرکز دالبندین ښار کې له کوټې څخه د یوه مړي د لېږد موټر پر کاروان د وسلهوالو په ډزو کې څلور کسان ټپیان شوي دي.
