د طالبانو مخالفې ډلې «مقاومت جبهې» په هرات ولایت کې د طالبانو له لوري د خلکو، په ځانګړې توګه د ښځو سیستماتیک ځپل په کلکه غندلي دي. دغه ډلې د غبرګولي ۱۹مه په یوې خبرپاڼه کې ویلي، چې د هرات د ټولنې پر وړاندې د طالبانو دا ډول بریدونه او تاوتریخوالی به بې ځوابه پاتې نه شي.
په اعلامیه کې راغلي، د افغانستان تاریخ ثابته کړې چې د ځپلو ستراتیژي، د وګړو پر شخصي حریم تېری او د ښځو تاریخي او کلتوري حیثیت ته بېاحترامي د مستبدو رژیمونو د زوال او سقوط ښکاره نښه ده. مقاومت جبهې د طالبانو دا کړنې د ټولنې پر ناموسي مسایلو او شخصي حریم ښکاره تېری بللی او دا یې د تاوتریخوالي نوی پړاو یاد کړی دی.
دوی زیاته کړې، چې د طالبانو رژیم له نړیوالې انزوا او د ملي مشروعیت له نشتوالي سره مخ دی او هڅه کوي په دغه ډول ځپلو سره د بېوزلۍ، وزګارتیا، ازادۍ او عدالت په څېر د ټولنې له بنسټیزو غوښتنو او ځواب ویلو څخه وتښتي. په اعلامیه کې د ملګرو ملتونو وروستي راپور ته هم اشاره شوې، چې په کې د افغان ښځو پر عزت او ابرو د طالبانو تېری مستند شوی دی.
دې جبهې پر افغان ولس غږ کړی، چې د وروستیو تاوتریخوالو له قربانیانو سره خپل یووالی وساتي او پیاوړې یې کړي. د اعلامیې په پای کې ټینګار شوی، چې د ښځو پر وړاندې تاوتریخوالی نه یوازې مېړانه نه ده، بلکې له هېڅ ډول دیني او کلتوري معیارونو سره سمون نه خوري او طالبان به ډېر ژر د خپلو دغو جنایتونو تاوان ورکړي.
دا غبرګونونه په داسې حال کې مخې ته راځي چې په هرات کې د طالبانو له لوري د یو شمېر ښځو د نیول کېدو راپورونه خپاره شوي دي.
