ټرمپ وايي د عمان ساحل ته نږدې د لوېدلې امریکایۍ چورلکې پیلوټان روغ رمټ دي
د امریکا د سمندري ځواکونو یوې بېپیلوټه الوتکې د پوځ داپاچي بریدګرې چورلکې دوه پیلوټان وموندل او دواړه ژغورل شوي دي. دغه چورلکه د عمان ساحل ته نږدې په اوبو کې لوېدلې وه. ولسمشر ډونالډ ټرمپ ویلي چې پیلوټان «روغ رمټ» دي.
د امریکا د پوځ د مرکزي قوماندانۍ په وینا، اپاچي چورلکه د سې شنبې په ورځ د ځايي وخت له مخې سهار شاوخوا درې بجې د عمان ساحل ته نږدې د سیمې په اوبو کې د ګزمې پر مهال نسکوره شوې ده.
پوځ د پېښې د علت په اړه څه نه دي ویلي.
متحده ایالات او ایران اوس مهال په یوه نازک اوربند کې دي، خو کله ناکله نښتې او د ایران له لوري د امریکا د سیمهییزو متحدینو پر ضد د ډرونونو او توغندیو بریدونه هم کیږي.
مرکزي قوماندانۍ رویټرز ته ویلي چې د ژغورنې عملیات یوې بېپیلوټه الوتکې کړي.
ولسمشر ډونالډ ټرمپ، چې د جان ایف. کینیډي نړیوال هوايي ډګر په ځغل لیکه کې یې واشنګټن ته له ستنېدو وړاندې خبرې کولې، وویل چې «هیڅوک نه دي ټپیان شوي».
خو د امریکا مرکزي قوماندانۍ په ډېر احتیاط سره ویلي چې دواړه پوځیان په باثباته روغتیايي حالت کې دي.
