د هرات اوسېدونکې: طالبانو په لومړنیو ښوونځیو کې لوړ قد لرونکې نجونې ګواښلې دي
د هرات یوې اوسېدونکې افغانستان انټرنشنل ته په لېږلي پیغام کې ویلي، چې د طالبانو د امر بالمعروف او نهې عن المنکر وزارت محتسبین د دغه ولایت یوشمېر لومړنیو ښوونځیو ته ورغلي او د نجونو ونې یې اندازه کړې دي.
د نوموړې په وینا؛ هغه نجونو ته چې ونه یې له یو متر او ۳۰ سانتي مترو لوړه وه، خبرداری ورکړل شوی که د طالبانو له غوښتنو سره سم حجاب ونه کړي، نو سر له سبا به ښوونځي ته د تګ اجازه ورنه کړل شي.
هغې زیاته کړې، چې دغه پېښه دوه ورځې وړاندې یکشنبې په ورځ (د غبرګولي ۱۶مه) رامنځته شوې ده. د هغې په خبره؛ د طالبانو محتسبینو دغه نجونو ته سخت خبرداری ورکړی او حتی ګواښ یې ورته کړی، چې د حجاب د نه مراعاتولو په صورت کې به له سختو پایلو سره مخ شي.
هغه وایي، طالبانو دغه نجونو ته ویلي چې د دغه امر نه منلو په صورت کې به یې په مرمۍ وولي. د هغې په وینا؛ د دغه څرګندونو له امله په ښوونځي کې د وېرې او اندېښنې فضا خپره شوې ده.
دا په داسې حال کې ده، چې واک ته د طالبانو له رسېدو وروسته له شپږم ټولګي پورته د نجونو پر زدهکړو بندیز لګېدلی او نږدې پنځه کاله کېږي چې له شپږم ټولګي پورته د نجونو پرمخ ښوونځي تړلي دي. طالبانو تل ویلي، چې د نجونو د زدهکړو د بیا پیل لپاره د «شرعي اصولو» له مخې د مناسبو شرایطو د برابرولو په لټه کې دي.
