د پاکستان فدرالي تحقیقاتو اداره: زرګونه وګړي د زدهکړو په ویزو بهر تللي او هلته پاتې شوي
د پاکستان د فدرالي تحقیقاتو د ادارې چارواکو ویلي، چې برېتانيا ته د زدهکړو لپاره تللو ۱۰ زره پاکستاني وګړو هلته پناه غوښتې ده. دا څرګندونې د دغه هېواد د ملي اسمبلۍ د کورني امنیت کمېټې د مشر راجا خُرم نواز په مشرۍ جوړه شوې ناسته کې شوې دي.
د پاکستاني رسنۍ «جيو نیوز» د خبر له مخې، د تحقيقاتي ادارې عمومي مشر عثمان انور، له نورو هېوادونو څخه د پاکستانیانو د بېرته راستنولو په اړه د معلوماتو ورکولو پر مهال وویل، اروپايي ټولنې او نورو هېوادونو د غیرقانوني پاکستانیانو مسله راپورته کړې او په غیرقانوني توګه بېرون ته تلونکي کسان د پاکستان د بدنامۍ لامل ګرځي.
هغه په خپلو معلوماتو کې وویل چې سږ کال د سېلګرۍ په ویزه اذربایجان ته تللي ۷ زره پاکستانیان بېرته هېواد ته نهدي راستانه شوي او همداراز ۵۸۰ پاکستانیان بیلاروس ته تللي او بېرته نهدي راګرځېدلي.
هغه وویل چې په برېتانیا کې ۱۰ زرو پاکستانیانو د محصلۍ له ویزې ناوړه ګټه اخیستې او اوس یې د پناه غوښتې کړې ده، هغه زیاته کړې چې د مالیزیا او ازبکستان له لارې د انسانانو د قاچاق نوې لاره هم رابرسېره شوې ده.
همداراز هغه زیاته کړه، په ۲۰۲۵ کال کې ۳۹ زره ۷۸۶ بېاسناده کسان له الوتکو ښکته کړل شوي، له لیبیا څخه ۱۷۵ نیول شوي پاکستانیان بېرته هېواد ته راستانه کړل شوي، د تنظیم شویو سوالګرو په شمېر کې ۷۵ سلنه او د جعلي اسنادو په جوړولو کې هم ۳۱ سلنه کموالی راغلی دی.
